Category Archives: News

Gahunda ya ‘Papa Rumuri’ mu ngo mbonezamikurire zifashwa na Caritas Rwanda binyuze mu mushinga wa ECD uterwa inkunga na Plan International Rwanda yatumye zirushaho gukora neza, birenga kuba mu rugo mboneza mikurire gusa,  kuko uruhare rw’umugabo mu kwita ku mwana rwarushijeho kugaragara mu miryango.

N’ubwo bikunze kuvugwa no kwigishwa kenshi n’inzego zitandukanye ko uruhare rw’umugabo ari ingenzi mu burere n’imikurire y’umwana, ariko usanga ahenshi abagabo babiharira abagore.

Ibi rimwe na rimwe biviramo umwana kuvutswa uburenganzira bwe, burimo ubwo kujyanwa kwiga mu ngo mbonezamikurire y’abana bato (ECD), kutabona indyo yuzuye n’ibindi bishobora gutuma imikurire y’umwana itagenda neza.

Mu 2022, Umuryango Caritas Rwanda wa Kiliziya Gatolika, ubitewemo inkunga  na Plan International Rwanda, watangije gahunda ya ‘Papa Rumuri’ mu ngo mbonezamikurire bakorana nazo, hagamijwe gukemura ibibazo byahagaragaraga birimo kutabonera igihe bimwe mu by’ibanze byifashishwa hategurwa amafunguro y’abana, birimo inkwi n’amazi, ariko no kugira ngo abana barusheho kubona uburere bw’ababyeyi bombi.

Aho iyi gahunda yatangiye gukorwa, muri buri kagali harimo ba Papa Rumuri 10 bahagarariye abandi, kandi buri rugo mbonezamikurire rukaba rufite Papa Rumuri  uruhagarariye. Aba bose bahabwa amahugurwa agamije kubigisha uruhare n’umusanzu by’umugabo mu burere n’imikurire y’umwana by’umwihariko mu rugo mbonezamikurire, ku buryo nabo bagenda babyigisha abandi.

Bamwe mu babyeyi b’abagabo n’abagore bo mu Karere ka Gatsibo baganiriye na Kigali Today, bayitangarije ko gahunda ya ‘Papa Rumuri’ yatumye abana barushaho kwibona mu muryango wuzuye, birenga mu rugo mbonezamikurire bigera no mu miryango yabo, kuko ibyo ba ‘Papa Rumuri’, bigishwa banabishyira mu ngiro mu ngo zabo, bigatuma ubwuzuzanye bw’umugabo n’umugore burushaho gutuma bagera ku iterambere.

Jean Bosco Ndagiwenimana wo mu Murenge wa Kabarore, ni umubyeyi w’abana bane. Avuga ko kuva yatangira kwitwa ‘Papa Rumuri’, hari byinshi byahindutse, kuko mbere yumvaga ko kuba umugabo yahashye nta kindi kimureba.

Ati “Hari igihe njya nko mu mu rugo mbonezamikurire nkaganiriza abana, ngakina nabo, ukabona barishimye ndetse barabikunze cyane kubona umuntu w’umugabo arimo gukina nabo, ababwira ati nawe uzaba umugabo. Barabikunda cyane, kandi usanga ari n’ingenzi, kuko bitanga umusaruro, kuko uburezi bw’umwana budakwiye guharirwa umugore gusa. Iyo umubyeyi w’umugore ari mu masuku nanjye mba ngomba kuba mufasha mu mirimo yo mu rugo, no gutanga uburere ku bana, bigatuma hari aho tugera tutageraga mbere.”

Antoinette Yankurije, umubyeyi w’abana babiri wo mu Murenge wa Rwimbogo, avuga ko uruhare rw’ababyeyi b’abagabo rukenewe ku irerero, kuko bibafasha kuzuzanya mu mikorere n’imikoranire.

Ati “Ku irerero haba hari imirimo myinshi itandukanye, uruhare rw’umugabo iyo yabonetse wenda ni nko kwasa inkwi, kuvoma amazi, kuzana umwana ku Irerero no kumucyura. Iyo ahabonetse kandi ziriya nyigisho zihatangirwa, iyo azibonye bidufasha kubaka umuryango iwacu mu rugo.”

Umuhuzabikorwa w’umushinga ECD wa Caritas Rwanda, Christine Kayitesi, avuga ko kuva gahunda ya ‘Papa Rumuri’, yatangira imaze gutanga umusaruro.

Ati “Bifite umusaruro ugaragara cyane, kubera ko iyo uganiriye n’abagore, bakubwira ko no mu rugo habayeho impinduka, ntabwo umugore ari we ucyita ku mwana wenyine, kuko iyo afite ibyo arimo gukora, usanga umugabo yita ku mwana, kandi mbere byarebaga umugore gusa. Mbere umugore iyo yaburaga umwanya wo kuzana umwana mu irerero, umwana yarasibaga kandi ise ari mu rugo. Ariko uyu munsi icyo kintu ntabwo tukikibona, kubera ko iyo mama we atabonetse ngo amuzane, papa we aramuzana, akaza no kumucyura.”

Ikindi ni uko abagabo basigaye bafasha muri gahunda zo gushyiraho imirima y’igikoni mu ngo mbonezamikurire, bakita ku bijyanye no gushaka inkwi, amazi n’ibindi byose umugabo ashobora gutangamo umusanzu we.

Umuyobozi ushinzwe Ubuzima mu Karere ka Gatsibo, Jean Claude Habiyaremye, avuga ko uruhare rwa ba ‘Papa Rumuri’ mu ngo mbonezamikuriee rwagaragaje impinduka aho bari, kuko abagabo nabo bakenera inyigisho zo kumenya ukuntu bita ku bana.

Ati “Icyo twabonye cyiza cyane, ni uko iyo abagabo n’abagore bafatanyije muri izi gahunda mbonezamikurire y’abana bato, bituma urugo mbonezamikurire rwitabirwa, ibyo abana bakenera bikaboneka kandi binyuze mu mikoro yabo. Twe nk’Akarere tubibonamo ikintu gishobora kuramba, tukavuga tuti, n’igihe Caritas Rwanda yaba itagihari, umugabo n’umugore bakaba bafatanyije, bizakomeza bikore bitewe n’uko bumvise akamaro kabyo.”

Mu Karere ka Gatsibo by’umwihariko, Caritas Rwanda ikorana n’ingo mbonezamikurire 59 zirimo abana bato 1239, hamwe na ba ‘Papa Rumuri’ barenga 130, bakorera mu Tugari 10. Iyi gahunda iri no mu Turere twa Bugesera na Nyaruguru, aho Caritas Rwanda ishyira mu bikorwa Umushinga wa ECD ibitewemo inkunga na Plan International Rwanda.

 

 

Ubuhamya butangwa n’ababyeyi bo mu karere ka Bugesera barerera mu ngo mbonezamikurire zifashwa na Caritas Rwanda binyuze mu mushinga wa ECD, ku nkunga ya Plan International Rwanda, bugaragaza ko ibimina bivuguruye byabongereye ubushobozi bwo kurushaho kwiteza imbere no kwita ku ngo mbonezamikurire y’abana bato.

Icyo aba babyeyi bahuriraho iyo babajijwe ku kamaro k’itsinda ryo kwizigama no kugurizanya, bavuga ko mbere na mbere ribafasha kubona ibyo kwita ku ngo mbonezamikurire abana babo barererwamo, bagatanga ingero ko babashije kubagurira impuzankano, kubabonera ifu y’igikoma igihe iyo bahawe na Caritas Rwanda ifatanyije na Plan Rwanda yashize, kubabonera ibikomoka ku matungo, n’ibindi bikenerwa.

Uretse kwita ku bana, ababyeyi bavuga ko aya matsinda yanabafashije kwiteza imbere mu muryango, ku buryo wa mwana wavuye mu rugo mbonezamikurire akomeza kubona indyo yuzuye n’ibindi akenera ari no mu muryango we.

Penina Musabyimana, ni umuyobozi w’urugo mbonezamikurire “Kura ujye Ejuru” rwo mu mudugudu wa Cyogamuyaga, akagari ka Tunda, umurenge wa Kamabuye. Kimwe n’ahandi hari ingo mbonezamikurire zifashwa na Caritas Rwanda ifatanije na Plan International Rwanda, ababyeyi bazirereramo bibumbiye mu matsinda yo kwizigama no kugurizanya. Itsinda Penina arimo ryitwa Duharanire Isuku, rikaba rigizwe n’abanyamuryango 30, bizigama kuva ku Frw 200 kugeza kuri Frw 650 buri cyumweru.

Ati “Ni ukuvuga ko umugabane shingiro ari 200 ku buryo buri munyamuryango ashobora kwizigama imigabane itatu mu cyumweru, akongeraho Frw 50 y’ingoboka”.

Aya mafaranga yabafashije kwiteza imbere ku buryo uyu mubyeyi yabashije kubaka icyumba cyo kubikamo ibikoresho cyiyongera ku nzu yari asanzwe afite ndetse abasha kuyikorera amasuku ashyiramo sima akoresheje inguzanyo ya Frw 60.000 yatse mu byiciro bibiri bingana. Ababyeyi babana mu itsinda bamuhaye umuganda wo kubumba amatafari.

Gahunga Emmanuel ni umwe mu bibumbiye mu itsinda “Twite ku Bibondo” riherereye mu mudugudu wa Tunda, akagari ka Tunda, umurenge wa Kamabuye, rikaba ryaratangiye mu 2014 bizigama Frw 200, batangira bakorana na Plan International Rwanda naho mu 2022 batangira gukorana na Caritas Rwanda ku ‘bimina bivuguruye’.

Gahunga avuga ko muri ibi bimina bivuguruye bafitemo gahunda bise ‘kurasa ku ntego’ ibafasha kudapfusha ubusa inguzanyo ikabafasha kuyikoresha icyo bayisabiye. Iyi gahunda igamije gufasha umunyamuryango kugurizwa amafaranga babanje kureba icyo agiye kuyakoresha ndetse nabo bagasuzuma koko ko icyo yayasabiye ko aricyo yakoze.

Ati “Bituma ya nguzanyo idapfira ubusa umunyamuryango kuko yirinda gukora ikosa ngo abe yakoresha amafaranga icyo atayasabiye”.

Ku gite cye avuga ko iryo tsinda ryamufashije kurihirira abana be amashuri yisumbuye ndetse ubu akaba afite n’uri muri kaminuza. Avuga kandi ko ibimina bivuguruye babitangiye nyuma yo guhabwa amahugurwa na Caritas Rwanda ubu bakaba babikora neza ndetse buri munyamuryango akaba afite agatabo ko kubitsa.

Gahunga yongeraho ko afite gahunda yo kurangiza kwishyura Frw 100.000 aheruka kuguza mu itsinda akongera kuguza andi azakoresha ateza imbere ubuhinzi n’ubworozi bwe.

Nyirankundiye Josée nawe uri mu itsinda ryo kubitsa no kugurizanya ‘Twite ku bibondo’ yishimira ko ikimina cyamufashije gutera imbere kuko kuva yakijyamo yagujije Frw 60.000 aguramo ihene arazorora bimuha kubona amafaranga y’ishuri ry’abana.

Yaje kongera kuguza Frw 147.000 agura ihene n’inkoko abasha kongera umubare w’amatungo mu rugo rwe.

Ati “Nize n’umushinga wo kurangura ibitoki nkenga umutobe nkawugurisha nkabasha kwikenura ndetse ubu nindangiza kwishyura ayo nagujije nzaka indi nguzanyo nkomeze nkore niteze imbere kuko nabonye binyungura Frw 40.000 mu kwezi.

Uretse intego ya buri munyamuryango yo kwiteza imbere, hari n’intego bahuriraho

‘Abadahigwa’, ni irindi tsinda ryo kuzigama no kugurizanya rifashwa na Caritas Rwanda ifatanije na Plan International Rwanda, ryasuwe na Kigali Today. Rikorera mu murenge wa Ngeruka, mu kagari ka Ngeruka.

Nk’uko umuyobozi waryo, Habineza Emmanuel abisobanura, mu byo ryagejeje ku banyamuryango harimo kugura amatungo magufi arimo ihene n’inkoko. Umwaka ushize ubwo barasaga ku ntego (kugabana ayo bizigamye n’ayo bungutse nyuma y’icyiciro cy’ubwizigame) itsinda ryaguriye buri munyamuryango inkoko 3 zimuha amagi yo kugaburira abana mu rwego rwo kurwanya igwingira. Ihene zo umunyamuryango yaraguzaga, akagura izo ashaka ,akazishyura.

Mu mwaka ushize kandi iri tsinda ryari rifite indi ntego yitwa ‘Duce Nyakatsi mu buriri’, aho abanyamuryango batararaga ku mifariso bakanguriwe gufata inguzanyo bakayigura, none kuri ubu bose barara heza.

Umwaka wo kuzigama iri tsinda ryatangiye muri Nyakanga 2025 rikazawusoza muri Kamena 2026, rifite intego yo kurushaho kunoza isuku mu ngo, aho abanyamuryango bakangurirwa gufata inguzanyo zo kugura ibidomoro byo kubikamo amazi meza, kugira ngo urugo rubone amazi meza yo kunywa.

Umushinga wa ECD ukorera mu turere twa Bugesera, Nyaruguru na Gatsibo. Mu karere ka Bugesera ingo mbonezamikurire zikurikiranwa na Caritas Rwanda ku bufatanye na Plan International Rwanda ni 29, muri zo 13 ziri mu murenge wa Kamabuye naho 16 zikaba mu murenge wa Ngeruka. Ababyeyi barerera muri buri rugo mbonezamikurire baba bibumbiye mu itsinda ryo kubitsa no kugurizanya.

Ababyeyi bo mu Karere ka Nyaruguru mu Ntara y’Amajyepfo, bafite abana mu ngo mbonezamikurire (ECD) zifashwa na Caritas Rwanda ku nkunga ya Plan International Rwanda, bahamya ko ubufasha iyi miryango igenera izi ngo mbonezamikurire ari ingenzi cyane, kuko butuma ziba intangarugero.

Mu Karere ka Nyaruguru, Caritas Rwanda ku bufatanye na Plan International Rwanda, igeza ubufasha butandukanye kuri izi ngo mbonezamikurire ikorana na zo, harimo gutunganya aho abana bigira, gutanga imfashanyigisho ku bana no ku barezi, ibikoresho bifasha abana kwimenyereza kwandika no gusoma n’iby’isuku.

Hari kandi guhugura abarezi ku kwigisha abo bana, uburyo bwo kubitaho no kubakorera ibikinisho bifashishije ibikoresho biboneka hafi yabo, guhugura ababyeyi bafasha abo barezi buri munsi kwita ku bana, mu gutunganya indyo yuzuye igenewe abana ndetse no gukora isuku.

Si ibyo gusa kuko Caritas Rwanda igenera izo ngo mbonezamikurire ifu y’igikoma yujuje intungamubiri, ibikoresho byifashishwa mu guteka no kugaburira abana, birimo amasafuriya, ibikombe, amasahani n’ibindi. Zahawe kandi ibigega bifata amazi ndetse na ‘filtres’ ziyungurura ayo kunywa, matela abana baryamaho, imisambi bicaraho, hanyuma abarezi n’ababyeyi bita ku bana buri munsi bakagenerwa agahimbazamusyi.

Izi ni ingo mbonezamikurire zo mu ngo z’abaturage (HBECDs) baba baremeye kwakira abo bana, ubwo bufasha rero bugatuma ziba intangarugero zikishimirwa n’ababyeyi bazirereramo, nk’uko Mukahigiro Beatha uri no mu bita ku bana mu rugo mbonezamikurire rwitwa Kurujyejuru B, rwo mu Mudugudu wa Gacumu, Akagari ka Giheta mu Murenge wa Munini abivuga.

Agira ati “Caritas ku bufatanye na Plan yaduhaye amahugurwa yo kwita ku bana, ku buryo umwana uje hano akura neza mu gihagararo no mu bwenge kuko tubaha indyo yuzuye, cyane ko tuzi ko mu ifunguro ry’umwana ritagomba kuburamo imboga, nta gwingira rirangwa hano. Twigishijwe kandi gukorera ibikinisho abana, bifasha gukangura ubwonko bwabo. Turashimira cyane Caritas na Plan, kuko badufasha bityo Kurujyejuru B yacu ikaba bandebereho”.

Yungamo ko ibyo kugaburira aba abana ababyeyi babikusanya bakabizana, ariko kandi ngo baba mu matsinda y’amarerero, bakagira amafaranga bizigamira buri cyumweru, harimo ayabafasha kugura ibyo badahinga nk’amavuta, indagara n’ibidi (ingoboka).

Muhimpundu Marthe, umurezi muri Kurujyejuru B, avuga ko amahugurwa yahawe atuma akurikirana abana ku buryo bukwiwe.

Ati “Amahugurwa Caritas ifatanyije na Plan yaduhaye, atuma nita ku bana uko bikwiye. Mu munsi ya mbere hari ubwo bagorana, bakarira, ariko kubera nize kubitaho, hari ibikinisho twikorera bidufasha bagakina, bagasabana, nyuma y’ukwezi bose baba baramenyereye”.

Yungamo ati “Umwana uza hano mu irerero atandukanye n’abandi bataricamo, kuko usanga akangutse ubwonko, imitekerereze, bakura neza mbese baba batandukanye cyane n’abandi. Umwana ava hano azi kubara kugeza ku 10, gutandukanya ibishushanyo, akagera mu ishuri ry’incuke yigaragaza aho aturutse. Ndashishikariza ababyeyi kuzana abana mu ngo mbonezamikurire kuko bibafasha kubana n’abandi, umwana ntabone umuntu ngo yiruke cyangwa arire”.

Umwe mu bagabo wahuguriwe kwita ku bana, Ndatsikira Innocent, ukorera mu rugo mbonezamikurire rwa Inyange ruri mu Mudugudu wa Ndago, Akagali ka Ngeli mu Murenge wa Munini, avuga ko adaterwa ipfunwe n’uwo murimo, ahubwo yabyungukiyemo.

Ati “Mbere yo guhugurwa numvaga ko iby’abana bato bireba umugore gusa, kuko ari ko nakuze mbibona. Ariko nyuma yo guhugurwa na Caritas ku bufatanye na Plan, nahinduye imyumvire. Ubu mu rugo iwanjye umugore adahari, ntibimbuza kwita ku mwana, nkamugaburira, yaba anitumye nkamutunganya, urumva ko nungutse. No mu rugo mbonezamikurire ni uko, mu ugitondo abana baza bahansanga, nzi kubategurira igikoma n’ifunguro ryuzuye, isaha yagera nkabagaburira, ufite ibitotsi nkamuryamisha, uwiyanduje nkamukorera isuku, mbese nta pfunwe bintera. Ndakangurira abagabo bagenzi banjye kumva ko umwana atari uw’umugore gusa, ko na bo kumwitaho bibareba kandi ari ingenzi”.

Akimana Angelique ukora akazi ko kudoda, avuga ko abona umwanya uhagije wo kwikorera, kuko umwana aba yamusize ahantu hizewe.

Ati “Ndazinduka ngategura umwana nkamusiga mu rugo mbonezamikurire, nkajya mu kazi kanjye. Nk’ubu iyo ndi ku mashini ndoda, iyo nari kuba ndi kumwe n’umwana yabaga arimo kundushya, nkamuterura, nkajya kumugaburira, ugasanga sinkoze uko nabiteganyaga, nkaba natenguha abakiriya banjye. Ariko kubera ko umwana mba namusize ahantu nizeye umutekano we, mu maboko y’ababyeyi, nkora ntuje kandi byinshi. Ndashimira cyane Caritas na Plan, badutera inkunga ituma abana bacu babaho neza”.

Buri rugo mbonezamikurire ruba rufite akarima k’igikoni gahinze mu buryo bwa kijyambere, kateguwe n’ababyeyi bafatanyije n’abakozi b’umushinga wa ECD. Aka karima gafasha ingo mbonezamikurire kubonera abana imboga, ariko ababyeyi bakanakigiraho, na bo bakajya guhinga imboga mu ngo zabo.

Umukozi w’Umurenge wa Munini ushinzwe gukurikirana amarerero, kurwanya imirire mibi n’igwingira, Ntakirutimana Donatha, avuga ko ingo mbonezamikurire zifashwa na Caritas Rwanda ku bufatanya na Plan, zifite umwihariko.

Ati “Bitewe n’ukuntu abita ku bana muri izi ngo baba barahuguwe, ubona bafite ubunyamwuga bwihariye, bakita ku bana ku buryo bwose, ari na yo mpamvu zitabirwa cyane. Ikindi ni uko ingo mbonezamikurire zikurikiranwa na Caritas iterwa inkunga na Plan, zifite ibikoresho bihagije bifasha abarezi kwita ku bana, kandi bakazisura kenshi, haba hari igikenewe kikaboneka bidatinze. Ubona hari umwihariko”.

Ntakirutimana akomeza asaba ababyeyi kwitabira kujyana abana babo mu ngo mbonezamikurire, kuko aho ziri haba hizewe, hari umutekano, ndetse abana bakahakura ubumenyi, ikinyabupfura, bakazajya mu mashuri y’incuke nta kibagora.

Mu Karere ka Nyaruguru, Umushinga wa ECD wa Caritas Rwanda uterwa inkunga na Plan International Rwanda, ukurikirana ingo mbonezamikurire 26, zirimo abahungu 290 n’abakobwa 311.

Padiri Oscar Kagimbura, Umunyamabanga Mukuru wa Caritas Rwanda, avuga ko ubushobozi bubonetse ibi bikorwa byakwagurirwa n’ahandi mu gihugu.

Agira ati “Ni byo koko ku bufatanye na Plan International Rwanda, Caritas Rwanda ikurikirana ibikorwa byita ku ngo mbonezamikurire y’abana bato mu turere twa Nyaruguru, Bugesera na Gatsibo, ariko uko ubushobozi bugenda buboneka hateganywa ko umushinga na wo wakwaguka ukagera no mu Turere twose. Ikindi ni uko ibikorwa nk’ibi bitagarukira kuri uyu mushinga gusa, kuko Caritas Rwanda isanzwe ifitanye imikoranire n’Ikigo cy’Igihugu cyita ku bana (NCDA), mu kwita ku bana bikanyuzwa muri Caritas za Diyosezi zikorera mu gihugu hose”.

Padiri Kagimbura akomeza avuga ko ibi byatumye mu myaka icumi ishize (2014-2024), ibikorwa bya Caritas byo kwita ku ngo mbonezamikurire y’abana bato mu bice bitandukanye by’Igihugu kandi bigikomeza, bitanga umusaruro ukurikira:

• Ibigo n’ingo mbonezamikurire 45,122 byaratangijwe, bihabwa ibikoresho n’ubufasha ngombwa ku byerekeranye n’imirire, hitabwa cyane cyane ku bana bari hagati y’imyaka itatu n’itandatu.
• Abana 1,794,595 bitabiriye kujya muri ibyo bigo. Muri bo, abagera ku 49,570 bari bafite imirire mibi bahabwa indyo yuzuye ikungahaye ku ntungamubiri, maze ubuzima bwabo burushaho kuba bwiza.

Abarezi 2,585,673 bahuguwe ku bijyanye n’inkingi 6 z’imbonezamikurire y’abana bato ari zo: (i) Imirire myiza; (ii) Ubuzima; (iii) Amazi, isuku n’isukura; (iv) Kurinda abana n’ubuzima budaheza; (v) Gutegurira abana ishuri; (vi) n’Uburere buboneye.

Ku nkunga ya Plan International Rwanda, Caritas Rwanda, Bamporeze Association, n’Imbaraga Farmers Organisation, bakoze ubukangurambaga buhamagarira ababyeyi kwita ku mbonezamikurire y’abana bato, kurengera umwana, no guteza imbere umuryango binyuze mu buhinzi bwa kijyambere. Ubu bungangurambaga bwabereye mu turere twa Nyaruguru (19/11/2025), Bugesera (20/11/2025), na Gatsibo (21/11/2025), bwitabirwa n’ababyeyi, abarezi, n’abayobozi b’inzego z’ibanze muri buri karere.

Mu nsanganyamatsiko igira iti “Dufatanye kurera, kurinda no guteza imbere imibereho myiza y’umwana n’umuryango,” ubu bukangurambaga bwakozwe binyuze mu mikino y’umupira w’amaguru, ikinamico, imivugo, ibiganiro, hakazamo n’umwanya w’ibibazo n’ibisubizo, abatsinze bagahembwa imipira yo kwambara.

Mu Karere ka Nyaruguru, ikipe y’ababyeyi y’umupira w’amaguru ya Mumporeze yegukanye intsinzi itsinze iya Papa Rumuri igitego 1 kuri 0, mu Karere ka Bugesera ikipe y’umurenge wa Kamabuye itsinda iy’uwa Ngeruka penaliti 4 kuri 3. Muri Gatsibo, ikipe ya Kiziguro  yatsinze iya Murambi igitego 1 ku busa.

Amakipe yatsinze yahawe igikombe cy’ishimwe n’amafaranga ibihumbi ijana (Frw 100.000), mu gihe amakipe ya kabiri yahawe amafaranga ibihumbi mirongo itanu (Frw 50.000).

Ubutumwa abafatanyabikorwa babiteguye batanze

Abahagarariye imiryango itatu yateguye ubu bukangurambaga ifatanije n’uturere batanze ubutumwa bujyanye n’ibikorwa basanzwe bakora:

• Caritas Rwanda yashimangiye akamaro ko gukura neza k’umwana binyuze mu nkingi esheshatu z’imbonezamikurire y’abana bato inashishikariza ababyeyi kwitabira kujyana abana mu ngo mbonezamikurire kuko bahungukira byinshi.
• Umuryango Bamporeze wagaragaje ko ari ngombwa kurera neza, guharanira uburenganzira bw’umwana, no guhuza imbaraga kw’inzego mu gukumira ihohoterwa rikorerwa abana.
• Umuryango w’abahinzi Imbaraga washishikarije imiryango kwitabira uburyo bugezweho bwo guhinga bukoresha ikoranabuhanga rigezweho kandi rijyanye n’imihindagurikire y’ikirere kugira ngo hongerwe umutekano w’ibiribwa, imirire myiza, no kubaka ubushobozi bw’imiryango.

  

Ubuyobozi bw’uturere bwashimiye abafatanyabikorwa

Abayobozi b’inzego z’ibanze muri buri karere bashimiye abafatanyabikorwa bateguye ubu bukangurambaga banizeza  gushyigikira gahunda zo kurengera no guteza imbere abana.

Bwana Gashema Janvier, Umuyobozi w’Akarere ka Nyaruguru wungirije ushinzwe iterambere ry’ubukungu, yashimye ubufatanye aba bafatanyabikorwa basanzwe bafitanye n’Akarere ka Nyaruguru, bitari muri ubu bukangurambaga gusa, ahubwo no mu zindi gahunda bakora.

Mu izina ry’Umuyobozi w’Akarere ka Bugesera, Rurangirwa Fred, umunyamabanga nshingwabikorwa w’umurenge wa Kamabuye, yashimiye abafatanyabikorwa kuko barebye ibibazo byugarije umuryango nyarwanda bakabihuriza hamwe, bagakora ubukangurambaga bubitangaho ibisubizo. Yagize ati: “Nidukomeza guhuza imbaraga, mwe nk’abafatanyabikorwa, natwe inzego z’ibanze, mpamya ko tuzagera kuri byinshi tukubaka umuryango nyarwanda uteye imbere kandi utekanye. Icy’ingenzi ni uko turimo kubaka u Rwanda rw’ejo rwiza tunyuze mu kwita ku bana, urubyiruko ndetse n’umuryango”.

Madamu Mukamana Marcelline, Umuyobozi w’Akarere ka Gatsibo wungirije ushinzwe imibereho myiza y’abaturage, yavuze ko ubuyobozi bw’Akarere ka Gatsibo buha agaciro ibikorwa by’abafatanyabikorwa bari muri ubu bukangurambaga.  Madame Marcelline kandi yagarutse ku ijambo ryakoreshejwe cyane muri ubu bukangurambaga “Umwana wanjye, Ishema ryanjye, ashimangira ko bikwiriye ko rishyirwa mu bikorwa agira ati:  “Umwana akiga, tukamurinda ihohoterwa, tukamwitaho mu buryo bwose ku buryo adutera ishema”.

Mu guhuza inzego z’ibanze, ababyeyi, abarezi, abana n’abaturage muri rusange, ubu bukangurambaga bwagaragaje ko uruhare rwa buri wese rukenewe kugira ngo abana bakurire mu miryango  itekanye, ibarera neza kandi yiteje imbere.

Ku nkunga y’Umuryango w’Ubumwe bw’Ibihugu by’Uburayi binyujijwe muri World Vision Rwanda, Caritas Rwanda yatangije umushinga Dukore Twigire mu Karere ka Karongi ku itariki 15 Ukwakira 2025, kuri Centre d’Accueil Sainte Marie Karongi. Ibirori byo kuwutangiza byahuje abayobozi b’akarere ka Karongi n’abandi bafatanyabikorwa b’ingenzi mu ishyirwa mu bikorwa ryawo. Ku munsi wakurikiyeho (tariki 16 Ukwakira 2025) habayeho n’igikorwa cyo gutangiza uyu mushinga mu nkambi ya Kiziba, ari naho uyu mushinga uzakorera.

Umushinga Dukore Twigire (2025–2028) ugamije guteza imbere ubudaheranwa kwihangana no kwigira kw’impunzi ziba mu nkambi ya Kiziba ndetse n’abaturage bayituriye.  Uyu mushinga uzafasha ingo 598, zirimo ingo 419 z’impunzi na 179 z’abaturage baturiye inkambi, hibandwa cyane cyane ku bagore, urubyiruko, n’abafite ubumuga.

Inama y’abafatanyabikorwa ba Karongi yo ku wa 15 Ukwakira 2025 yatanze urubuga ku bayobozi b’inzego z’ibanze, abafatanyabikorwa banyuranye, n’abagize komite y’impunzi kugira ngo baganire ku ntego z’umushinga, ingamba zo kuwushyira mu bikorwa, ubufatanye, n’umusaruro witezwe.

Mu ijambo yagejeje ku bitabiriye iyi nama, Padiri Emmanuel Bamporineza, Umunyamabanga Mukuru Wungirije wa Caritas Rwanda yavuze ko iyi nama ari umwanya mwiza wo kungurana ibitekerezo no gukomeza ubufatanye kugira ngo ibikorwa bizagire akamaro kandi birambe biteza imbere imibereho y’abaturage bigenewe. Padiri Emmanuel yagize ati: “Duhamya ko mu gushyira hamwe kwacu dushobora guhindura ubuzima bw’imiryango, kuyongerera icyizere no gufasha abantu kwigira”.

Nyuma yo kugaragaza intego n’ibikorwa by’umushinga Dukore Twigire, byakozwe n’umuhuzabikorwa wawo Jerôme Sebaganwa, abari bitabiriye uyu muhango babajije ibibazo byinshi birimo ikirebana no kumenya niba inkunga ya Frw 1.000.000 izajya ihabwa buri muryango ngo witeze imbere ari yo izajya ikurwamo awutunga ku kwezi. Aha basubijwe ko hari ubufasha buzahabwa imiryango mu gihe cy’amezi 6, bungana n’ayo imiryango itishoboye isanzwe ihabwa mu nkambi, ariko butari muri ayo Frw 1.000.000.

Abari mu nama kandi babajije niba abaziga imyuga bazayihitiramo, basubizwa buri muntu azihitiramo. Mu bijyanye n’inyunganizi, havuzwe ku gutoza abagenerwabikorwa ubunyangamugayo. Aha na none basubijwe ko abanyamuryango bahabwa amahugurwa yitwa Hinduka Wigire, aho bigishwa indangagaciro kugira ngo ubuzima bwabo buhinduke mu buryo bwuzuye.

Innocent Bihira wari uhagarariye umuyobozi w’Akarere ka Karongi, yashimiye abafatanyabikorwa bitabiriye iki gikorwa anizeza ubufatanye bw’Akarere mu ishyirwa mu bikorwa ryawo. Yongeyeho ko uyu mushinga uzahindura ubuzima bw’abatuye Karongi muri aya magambo: “Imyaka 3 izavamo umusaruro mwiza uzadufasha kugira ngo akarere kacu kave ku rutonde rw’uturere dukennye, kajye mu twifashije”.

Umushinga Dukore Twigire, uzateza imbere impunzi zo mu nkambi ya Kiziba n’abaturage bayituriye binyuze mu bintu bitatu by’ingenzi:

• Guteza imbere imibereho y’abagenerwabikorwa binyuze mu gutanga amahugurwa, inkunga y’amafaranga n’iy’ibitekerezo kugira ngo batangize cyangwa bagure imishinga ibyara inyungu.
• Kunoza imibereho myiza, imibanire myiza, no guhindura imyitwarire ikaba myiza, binyunze mu guteza imbere ubuzima budaheza, kurinda no guteza imbere ubudaheranwa bw’impunzi n’abaturage baturiye inkambi.
• Kongera uburyo bwo kwinjiza imari, binyuze mu gushinga amatsinda yo kuzigama no kugurizanya, kugezwa kuri serivisi z’imari no kubona amakuru ajyanye n’amasoko. kunoza serivisi zimari namakuru yisoko.

 

Binyuze muri Porogaramu ya Igire-Gimbuka, ku nkunga ya BK Foundation, ku itariki ya 1 Ukwakira 2025, Caritas Rwanda yashyikirije ibikoresho abana b’imfubyi n’abandi bugarijwe n’ibibazo (OVC) 40 bo mu Karere ka Nyamasheke, basoje amahugurwa y’ubumenyingiro (TVET), kugira ngo babashe kwihangira umurimo biteze imbere.

Uyu muhango witabiriwe n’ubuyobozi bw’inzego z’ibanze, abakozi ba Caritas Rwanda, abanyeshuri n’ababyeyi babo ndetse n’abahagarariye BK Foundation. Ibi bikoresho byatanzwe hakurikijwe imyuga abanyeshuri bize, ari yo ubudozi, gutunganya imisatsi, ubukanishi bw’ibinyabiziga n’ubwubatsi.

Mukeshimana Grâce, umwe muri aba basoje imyuga kuri Rays of Hope TVET School, yashimiye Caritas Rwanda ibinyujije mu mushinga wayo wa Igire-Gimbuka na BK Foundation ndetse n’abayobozi b’ibigo aba banyeshuri bizeho kuko babafashije kwiga imyuga. Yongeyeho ko mu gihe cy’imenyerezamwuga amafaranga bamuhaga yayazigamaga kugira ngo azamugirire akamaro we n’umwana we.

Mugenzi we Nsabayesu Claude wize ubukanishi bw’imodoka kuri Samuduha Integrated College, yavuze ko amafaranga yasaguraga ku yo bamuhaye mu imenyerezamwuga yaguzemo ingurube. Yagize ati: “N’ubu umpaye Frw 200.000 ntabwo nayiguha”.

Nyirangirinshuti Judith wavuze mu izina ry’abandi babyeyi, yashimiye abafashije abana babo kuva mu burara bakiga imyuga none bakaba banabahaye ibikoresho bibafasha gutangira gukora. Nawe yavuze ko mu gihe cyo kwimenyereza umwuga umwana we yizigamye akabasha kugura inkoko 20.

Uretse guhabwa ibikoresho, abanyeshuri banahawe impamyabushobozi.

Impanuro abanyeshuri n’ababyeyi babo bahawe

Uwari uhagarariye umuyobozi wa BK Foundation, Uwayo Joel, yavuze ko imwe mu nkingi za BK Foundation ari ugushyigikira uburezi, ati: “Rwose mudufashe, izi mbaraga zashyizwe muri ubu bufatanye ntizizapfe ubusa”.

Ntakirutimana Jean, umuyobozi wungirije wa porogaramu ya Igire-Gimbuka ya Caritas Rwanda, yabwiye aba barangije imyuga ko kwiga gushakisha amasoko ari ikintu kimwe no kuyabona ukayabyaza inyungu ari ikindi, abasaba kugira ubunyamwuga n’ubunyangamugayo mu byo bakora kugira ngo batere imbere.

Mu ijambo yagejeje ku bitabiriye uyu muhango, Umuyobozi w’Akarere ka Nyamasheke wungirije ushinzwe imibereho myiza y’abaturage Madamu Mukankusi Athanasie, yabwiye abanyeshuri ko badategetswe gukorera muri Nyamasheke gusa ahubwo bakazagura imbago bakagera n’ahandi. Uyu muyobozi yagize ati: “Uko mubona ako kantu kari ku ngofero zanyu kizunguza kakajya hose, ni ko namwe mukwiriye kugera hose mukora ibyo mwize kandi mukorera amafaranga”.

Madame Athanasie kandi yabwiye ababyeyi ko aba bana babakeneye cyane kurusha mbere, bakaba bakwiye gukomeza kubaba hafi babagira inama kugira ngo biteze imbere.

Uyu ni umusaruro w’ubufatanye burambye

Iki gikorwa kibaye nyuma y’amasezerano y’ubufatanye hagati y’abafatanyabikorwa 5 bashyiraga mu bikorwa Porogaramu ya Igire-Gimbuka (kuko babiri ntibakiyikora) na BK Foundation yashyizweho umukono muri Kanama 2024, aho BK Foundation yiyemeje gufasha urubyiruko 200 ruturuka mu mirenge y’uturere twatoranyijwe  (Muhanga, Kayonza, Kicukiro, Rwamagana na Nyamasheke) kwiga imyuga (TVET) binyuze muri Igire-Gimbuka.

Ibirambuye kuri aya masezerano y’ubufatanye wabireba ku rubuga rwacu:

https://caritasrwanda.org/kiny/fondasiyo-ya-bk-igiye-gufasha-urubyiruko-200-kwiga-imyuga-binyuze-muri-gahunda-ya-igire-bitarenze-2027/

Kureba video y’iki gikorwa, kanda aha hakurikira:

https://www.youtube.com/watch?v=LtCAla_yeoE&t=376s

Mu rwego rwo guteza imbere imikoranire hagamijwe impinduka nziza zirambye, Caritas Rwanda yagiranye inama n’abapadiri ba Diyosezi ya Nyundo, muri zone ya Nyundo/Kibuye ku itariki 11/09/2025 n’abo muri zone ya Gisenyi ku itariki 12/09/2025. Izi nama zitabiriwe n’abantu basaga 60 barimo abapadiri, abakozi ba Caritas Nyundo, zone ya Kibuye na Caritas Nyundo, zone ya Gisenyi, n’aba Caritas Rwanda.

Mu ijambo yagejeje ku bitabiriye inama (kuri 11 na 12 Nzeri), Padiri Oscar KAGIMBURA, Umunyamabanga wa Caritas Rwanda yasobanuye ko ubutumwa bwa Caritas bushingiye ku rukundo, ku ivanjiri. Iyi nama ikaba yari igamije kurebera hamwe uburyo hanozwa imikorere n’imikoranire hagati ya Caritas n’inzego za Kiliziya (kuva kuri paruwasi kugera mu miryango remezo), ibi bigatuma ibikorwa bakora birushaho kubyara umusaruro.

Padiri Oscar KAGIMBURA, yibukije abitabiriye inama, mu ncamake ibikubiye muri Gahunda y’ibikorwa bya Caritas Internationalis[1] mu magambo akurikira: “Tugendeye ku Ivanjiri n’ubuhamya bw’abantu bari mu bukene, turi mu butumwa rusange bwa Kiliziya Gatolika bwo:

• Kurengera ubuzima no kugabanya ingaruka z’ibiza twubaka imiryango ifite kwigira, dutabara byihuse kandi mu buryo bunoze abahuye n’ibiza (Ishami Gufasha abatishoboye n’ubutabazi, Ishami ry’Ubuzima);
• Guteza imbere ubuzima bw’abantu na kominote z’abantu binyuze mu kuzamura iterambere ryuzuye rya muntu, kubaka no kuzahura amahoro ndetse n’ubutabera (Amajyambere, amahoro n’ubutabera);
• Guhamagarira abantu guhindura isi ikaba nziza binyuze mu kuzamura ijwi ry’abo twakira no guhuriza hamwe abantu kugira ngo baharanire ibyabo no gufata ingamba (Ubuvugizi)”.

Umunyamabanga Mukuru wa Caritas Rwanda kandi yibukije inkingi ebyiri Caritas ishingiyeho ari zo “gutegura ubunyamwuga” no “gutegura umutima” nk’uko bigaragara mu nyandiko ya Papa Benedigito wa XVI Deus Caritas Est (Imana ni urukundo)[2], yatangajwe kuri 25 Ukuboza 2005 (urupapuro rwa 31). Padiri Oscar KAGIMBURA yaboneyeho gusaba abakozi ba Caritas bose kugira umutima wa Caritas, urangwa no kugirira impuhwe abo bashinzwe kugezaho ubutumwa.

Padiri Oscar Kagimbura, Umunyamabanga Mukuru wa Caritas Rwanda ubwo yagezaga ijambo ku bitabiriye inama muri zone ya Nyundo/Gisenyi. Iruhande rwe hari Padiri Jean Paul Rutakisha, Umuyobozi wa Caritas Nyundo/Gisenyi.Iyi nama yanabaye umwanya mwiza wo gutanga ibisobanuro byimbitse kuri Caritas Nyarwanda, imisanzu ijya mu kigega cyayo ikaba igamije gutabara mu buryo bwihuse abakene n’abahuye n’ibiza bitabaye ngombwa gutegereza inkunga zivuye hanze.

Habayeho umwanya wo kwisuzuma mu matsinda

Abitabiriye iyi nama haba muri diyosezi ya Nyundo, zone ya Kibuye niya Gisenyi,bakoreye mu matsinda mu rwego rwo gusuzuma imikorere isanzweho bakurikiza ibintu bine ari byo: imbaraga, intege nke, amahirwe n’imbogamizi bihari. Nyuma yaho barebeye hamwe ibikwiriye guhagarikwa gukorwa, ibyo kongeramo imbaraga n’ibikwiye gutangira gukorwa mu birebana no gusangizanya amakuru, ubuvugizi, imikorere n’imikoranire.

Imwe mu myanzuro yavuye mu matsinda harimo (1) kunoza urutonde na gahunda ya Garukushime ku bafashijwe na Caritas, (2) gukangurira abafatanyabikorwa kugira umutima wa Caritas, (3) no gukora ubukangurambaga bw’Ukwezi kw’Urukundo n’Impuhwe mu buryo buhoraho hagamijwe gukemura imbogamizi zo kugera ku banyeshuri mu gihe cy’ibiruhuko n’igihe cy’isarura ku bahinzi.

Harimo kandi (4) kongera imbaraga mu gutanga raporo y’imikoreshereze y’umusanzu w’Ukwezi kw’Urukundo n’Impuhwe ku nzego zose za Caritas, (5) kongera imikoranire hagati y’inzego za Caritas, (6) gutunganya imirimo ku bafite inshingano muri Caritas, mu nzego zayo aho kwitwara nk’abakorera imishinga yayo, (7) no kongera imenyekanishabikorwa bya Caritas mu mashami y’amajyambere n’ubuzima.

Abitabiriye iyi nama kandi basabye ko (8) abakozi b’imishinga ya Caritas barushaho kugaragaza isura nyayo yayo no gufatanya n’inzego za Caritas mu gushyira mu bikorwa imishinga bakorera, no (9) kongerera imbaraga n’ubushobozi abakangurambaga b’amajyambere n’ubuzima binyuze mu mishinga ikorwa, kugira ngo bazakomeze gukorana n’abafatanyabikorwa na nyuma y’imishinga.

[1] https://www.caritas.org/wordpress/wp-content/uploads/2023/06/EN22GA-04_Strategic-Framework-.pdf  page 5

[2] https://www.vatican.va/content/benedict-xvi/en/encyclicals/documents/hf_ben-xvi_enc_20051225_deus-caritas-est.html

Ku wa 22 Kanama 2025, Caritas Rwanda yakoranye inama na Caritas za Diyosezi mu rwego rwo gusuzuma ibikorwa by’umwaka wa 2025, ari wo wa mbere wa Gahunda y’imyaka 6 ya Caritas Rwanda (2025-2030). Iyi nama yabereye kuri Centre Bonne Espérance ku Kicukiro.

Mu ijambo rifungura iyi nama ku mugaragaro, Padiri Oscar Kagimbura, Umunyamabanga Mukuru wa Caritas Rwanda yavuze ko iyi nama igamije gusuzuma aho ibikorwa Caritas yateganije mu mwaka wa 2025 bigeze bishyirwa mu bikorwa no kureba ibyihutirwa kugira ngo bishyirwemo imbaraga.

Gahunda y’ibikorwa yasuzumwe kandi ivugururwa binyuze mu mashami ya Caritas ari yo: Ishami ry’Ubuyobozi n’Imari, Ishami ry’Ubuzima, Ishami ryo Gufasha abatishoboye n’Ubutabazi, n’Ishami ry’Amajyambere.

Isuzuma ry’ibikorwa bya Caritas biteganijwe muri 2025 ryerekanye ko birimo gushyirwa mu bikorwa uko bikwiriye keretse aho inkunga zahagaze bitararangira.  Iri suzuma ryagaragaje ko hari bike byahindurwa. Urugero ni ibikorwa birebana n’ingo mbonezamikurire y’abana bato (ECD) hamwe biba mu Ishami ry’Ubuzima, ahandi bikaba mu Ishami ry’Amajyambere. Abari mu nama bavuze ko byashyirwa mu Ishami ry’Ubuzima.

Gahunda ya Caritas Rwanda y’imyaka 6 (2025-2030) ifite intego rusange ikurikira: “Guteza imbere imibereho y’abatishoboye mu buryo burambye, no kubageza ku iterambere ryuzuye, twese dufatanije.”

Kugira ngo usome Gahunda ya Caritas Rwanda n’imyaka 6 (2025-2030) yose, kanda aha hakurikira: SPlan-Caritas-Rwanda-FNL-2530-20032025-Final-compressed.pdf

Ku ya 12 Kanama 2025, Caritas Rwanda yateguye kandi ikorana inama n’abahagarariye Imiryango y’Abiyeguriye Imana yabereye muri Centre Saint Vincent Pallotti i Gikondo. Iyi nama yari ifite intego eshatu zikurikira: kubibutsa Caritas n’impamvu iriho, intego n’ubutumwa byayo, indangagaciro zayo, inzego zayo, n’ibikorwa byayo.

Iyi nama kandi yari igamije gushimangira ubufatanye n’imikoranire, ndetse no gutanga raporo y’ibikorwa by’abihayimana bifasha abatishoboye, byose hagamijwe kwita ku batishoboye no kubasubiza agaciro bagenda bamburwa na sosiyete. Nk’uko babyivugiye, abiyeguriye Imana bo ubwabo bakora ubukangurambaga aho bakorera ubutumwa bahamagarira abantu   kugira umutima wa Caritas ariwo wo kwitangira abatishoboye.

Mu ijambo rifungura iyi nama ku mugaragaro, Padiri Oscar Kagimbura, Umunyamabanga Mukuru wa Caritas Rwanda, yavuze ko kumenyekanisha ibikorwa birebana no kwita ku batishoboye atari ukwiyamamaza ahubwo ko hari igihe bitangazwa mu rwego rwo gukora ubuvugizi, kugira ngo abantu bababaye babone ubufasha.

Soeur Gaudiose Nyiraneza, ushinzwe ubukangurambaga bw’ibikorwa by’urukundo mu Ishami ryo Kwita ku Batishoboye n’Ubutabazi muri Caritas Rwanda, yatanze ikiganiro ku Kwezi kw’Urukundo n’Impuhwe, kwashyizweho n’Abepiskopi hagamijwe kwiyubakira Caritas Nyarwanda. Soeur Gaudiose yanerekanye urugero rw’inkunga yagiye ikusanywa mu myaka yashize, ndetse n’ingamba zafashwe zo kongera umusaruro wo gufasha abatishoboye.

Nyuma y’iki gikaniro, Bwana Prosper Sebagenzi, Umuyobozi wa Porogaramu muri Caritas Rwanda, yatanze ikiganiro kuri Caritas Rwanda (Icyerekezo cyayo, Inshingano zayo, Indangagaciro zayo) n’ibikorwa byayo binyuzwa mu nzego zayo zose zikurikira:  Caritas za Diyosezi 10, Paruwasi 235, Caritas za santarali 882, n’imiryango remezo 29.141.

Uruhare rw’imiryango y’Abiyeguriye Imana mu gushyigikira abatishoboye ni ingenzi cyane nk’uko byagaragajwe n’ibiganiro bagize basobanura ibikorwa bitandukanye bakora.

Abitabiriye inama kandi baganiriye ku Kwezi kw’Urukundo n’Impuhwe (Kanama), kwashyizweho n’Abepiskopi Gatolika mu Rwanda hagamijwe kwiyubakira Caritas Nyarwanda yita ku n’iterambere risesuye ry’abatishoboye.

Bimwe mu bitekerezo byatanzwe n’abahagarariye imiryango y’Abiyeguriye Imana

Nyuma yo kugezwaho imyanzuro yavuye mu rugendoshuri rwakozwe na Caritas za diyosezi na Caritas Rwanda muri Diyosezi ya Ruhengeri (yabaye iya mbere mu gukusanya umusanzu w’Ukwezi k’Urukundo n’Impuhwe mu 2023 na 2024), abari mu nama batanze ibitekerezo binyuranye bigamije kurushaho kunoza iki gikorwa.

Nk’uko abahagarariye imiryango y’Abiyeguriye Imana babivuze, abantu benshi bafata Caritas nka Caritas bintu: itanga imfashanyo gusa, bagasanga kugira ngo ibi bihinduke, ubukangurambaga bugamije guhindura iyi myumvire bugomba kongerwamo imbaraga twese dufatanije.

Ku bijyanye no gukusanya umusanzu w’Ukwezi k’Urukundo n’Impuhwe, abari mu nama bavuze ko ukwezi kwa 8 gusa kudahagije, basaba ko kuwegeranya byajya bitangira byibura muri Mutarama.

Ikindi cyafasha mu bukangurambaga bw’Ukwezi k’Urukundo n’Impuhwe, ni ugutegura igikorwa cyo gutanga ubuhamya imbere y’Abakristu ku bafashijwe na Caritas. Ibi nk’uko babisobanuye, byafasha abantu benshi kumva Caritas n’umumaro cg ubutumwa bwayo.

Ku birebana no gutanga raporo ku bikorwa byakozwe n’imiryango y’Abiyeguriye Imana, abari mu nama basabye ko hatangwa ifishi bajya buzuza, amakuru agatangwa neza kandi ku gihe. Kuri iki gitekerezo, Abayobozi ba Caritas Rwanda bashishikarije abitabiriye inama gukorana bya hafi na Caritas za Diyosezi.

Muri iyi nama kandi havuzwe ko abakristu bo muri Paruwasi Saint Pierre Cyahafi muri Arkidiyosezi ya Kigali batangije “Caritas Iwacu”, ikaba ifite umuhuzabikorwa uhoraho, n’abakristu batanga imisanzu mu buryo buhoraho. Iki gikorwa bumva kigejejwe n’ahandi byaba byiza.

Abahagarariye imiryango y’Abiyeguriye Imana bari muri iyi nama kandi basabye ko buri mwaka hajya hakorwa inama nk’iyi yo kungurana ibitekerezo.

Mu gusoza iyi nama, Padiri Oscar Kagimbura yashimiye abahari ko bitabiriye ubutumire, abashimira ibitekerezo batanze,  anabashimira cyane cyane ibikorwa byiza bakora byo kwita ku batishoboye. Kuri iyi ngingo, Padiri Oscar yagize ati: “Gutanga bituruka ku mutima witangira abandi ntibituruka ku byo umuntu atunze”.

Imiryango 42 itishoboye yo mu murenge wa Ruharambuga, Akarere ka Nyamasheke, yahinduriwe ubuzima binyuze mu mushinga w’ubufatanye hagati ya Caritas Cyangugu, Ikigo cy’Igihugu gishinzwe Iterambere (RDB), n’Akarere ka Nyamasheke. Uyu mushinga ujyanye n’ishyirwa mu bikorwa rya gahunda y’igihugu yo gusaranganya inyungu zituruka ku bukerarugendo n’abaturage batuye hafi y’ibice bikurura ba mukerarugendo, harimo ishyamba rya Nyungwe.

Mukarurangwa Marianne, umwe mu bahawe inzu, agaragaza uko yakiriye ibyishimo by’iyi nkunga yagize ati: “Twari tumaze igihe kinini turara mu mbeho no mu mvura. icyo gihe twaryamye mu buryo budasanzwe, nk’abapfuye kubera ibyishimo.”

Buri nzu ifite ibyumba bitatu, uruganiriro, igikoni, ubwiherero n’ubwogero biri hanze, ndetse n’ibigega by’amazi bifite ubushobozi bwa litilo 5,000 (inzu 2 zifatanije) cyangwa 3,000 (harimo inzu 2 zifite iki kigega buri imwe). Nk’uko bigaragara, izi nzu si icumbi gusa, ahubwo ni ikimenyetso cy’icyizere n’agaciro byagaruriwe imiryango yari ituye mu mazu yangiritse cyangwa yari hafi yo gusenyuka.

Padiri Hyacinthe Irakoze, Umuyobozi wa Caritas Cyangugu, yasobanuye ko uyu mushinga watewe inkunga na RDB binyuze ku mafaranga aturuka ku nyungu z’ubukerarugendo ahabwa uturere, Caritas ikaba yarafatanyije n’Akarere kubaka izi nzu. Yagize ati: “Nyuma yo kuzubaka, dushyiramo ibikoresho by’ibanze n’ibiribwa kugira ngo utujwe abone uko abaho. Caritas ishakisha ubundi bufasha butuma inzu ziba nziza kurushaho”.

Kugeza ubu, imiryango 26 imaze gutuzwa, naho indi 16 izimurwa vuba kuko inzu zabo zigeze kure. Bamwe muri aba bafite amazu nka Bavugamenshi Théobald na Musabyimana Marthe bashimira uburyo babayeho neza, bavuga ko aho batujwe ari umudugudu w’icyitegererezo.

Bagamije kurushaho gutura heza, abatujwe muri aya mazu bari gukusanya amafaranga yo kuzana amashanyarazi. Buri muryango wiyemeje gutanga amafaranga Frw 10.000. Kugira ngo bazabashe kubigeraho, Caritas yemeye kuzabakorera ubuvugizi ku Karere ka Nyamasheke, nako kagakorana n’ikigo gishinzwe gutanga amashanyarazi (REG), kugira ngo iki kibazo gikemuke.

Nsengamungu Denis, mutwarasibo w’aha hubatse amacumbi, yagize ati: “Tumaze gukusanya ibihumbi 120 Frw. Kandi turacyarimo kwakira ubwitange. Turabasaba kutuvuganira kugira ngo tubone umuterankunga wadufasha amashanyarazi akatugeraho”.

Imiryango yatujwe muri izi nzu irimo kubakirwa irerero rizaba rifite ibyumba bibiri, igikoni, ububiko, imisarani, n’ikibuga abana bazajya bakiniramo. Ibi ni ukugira ngo abana b’inshuke barererwe hafi y’ababyeyi, mu gihe bari mu mirimo yungura urugo.

Kureba ubuhamya bw’abatujwe muri izi nzu, kanda kuri video ikurikira: