Blog

Ku wa kabiri tariki 24/09/2024, bamwe mu bakozi ba Caritas Rwanda mu ishami ryo gufasha abatishoboye n’ubutabazi, bakoranye inama n’abayobozi b’amashami ya Caritas Kibungo, barebera hamwe aho imyanzuro y’Inteko Rusange ya Caritas Rwanda 2023 igeze ishyirwa mu bikorwa, ndetse n’ingamba zafashwe mu bukangurambaga bwo kuzamura umusaruro w’ukwezi k’urukundo n’impuhwe. Iyi nama yabereye ku cyicaro cya Caritas Kibungo.

Nyuma y’isengesho ritangiza iyi nama, Padiri Shyaka Jérémie umuyobozi wa Caritas Kibungo yafunguye inama, aha ikaze abashyitsi baturutse muri Caritas Rwanda.

Abari mu nama barebeye hamwe uburyo bwo kugaragaza ibikorwa bya Caritas binyuze mu bitangazamakuru bya Kiliziya Gatorika no ku mbuga nkoranyambaga, banahabwa amahugurwa magufi ku buryo bwo kwandika inkuru, ibi bikazafasha abakozi bo mu mashami yose kwandika inkuru zizanyuzwa muri Kinyamateka no mu Kanyamakuru ka Caritas Rwanda kitwa Caritas Contact/Ihuriro rya Caritas.

Muri iyi nama habayeho kwibukiranya ibikorwa by’ingenzi mu rwego rwo kwizihiza umunsi mpuzamahanga w’Abakene ari byo gusangira Igitambo cya Misa, gusangira n’abakene no kubaremera. Ku munsi wa Caritas wo habaho kuvuga kuri Caritas, gushima abakoreye Caritas, abafashijwe na Caritas bakaba batanga ubuhamya n’ubufasha ku batishoboye.

Kuri iyi ngingo, abakozi ba Caritas Kibungo bavuze ko umunsi mpuzamahanga w’Abakene n’umunsi wa Caritas byizihirizwa rimwe muri paruwasi zose, uretse Paruwasi ya Rukoma ifite umwihariko wo kuyizihiza ku rwego rwa santarali. Mu kwizihiza umunsi mpuzamahanga w’umukene, abantu bo mu madini atandukanye batanga ubufasha bugenewe abakene kuko iyo Caritas igiye gufasha abantu itarobanura. Abari mu nama bibukiranije kandi ko uretse ubufasha bw’ibifatika abakene bahabwa, bakeneye cyane urukundo, ibi bikaba bikwiye kwigishwa.

 

Ubukangurambaga bw’ukwezi k’urukundo n’impuhwe

Hagamijwe kuzamura umusaruro w’ukwezi k’urukundo n’impuhwe, muri Gicurasi na Kamena 2024, abakorerabushake ba Caritas bakoze ubukangurambaga hirya no hino muri za paruwasi. Caritas Kibungo kandi irateganya gukora ubukangurambaga mu mashuri, kuko mu gihe bwakorwaga muri za paruwasi, abanyeshuri bari bari mu biruhuko.

Indi ngamba Caritas ya Kibungo iteganya ni ugukora urubuga rw’abarihiwe amashuri na Caritas, ikabahamagarira kujya batanga umusanzu wo gufasha abatishoboye.

Nk’uko abakozi ba Caritas Kibungo babivuze, muri za paruwasi batangira gukusanya umusaruro w’ukwezi k’urukundo n’impuhwe muri Gicurasi na Kamena, ahatanzwe ibiribwa bipfa bagahita babiha abatishoboye, ibitangirika bikabikwa bikazahabwa abakene batoranijwe ku munsi mpuzamahanga w’umukene mu Ugushingo.

Abari mu nama kandi banaganiriye ku zindi ngamba zakoreshwa kugira ngo bakangurire abantu benshi kwitabira gutanga umusanzu w’ukwezi k’urukundo n’impuhwe, zirimo gukora ubukangurambaga ahateraniye abantu hakoreshejwe indangururamajwi, kunyuza ubutumwa mu bagize amatsinda yo kubitsa no kugurizanya afashwa n’imishinga itandukanye ya Caritas Kibungo. Hari kandi no gukora ubukangurambaga mu bagenerwabikorwa b’imishinga. Kugira ngo ibi byorohe, abari mu nama bavuze ko abakora muri iyo mishinga bajya bakorana n’abakozi bo mu ishami ryo gufasha abatishoboye n’ubutabazi, bakabafasha gukora ubukangurambaga.

Ku birebana no gutanga umurongo umwe, guhuza no gushimangira gahunda y’abakorerabushake mu muryango mugari wa Caritas, hibandwa ku gukangurira urubyiruko kuyitabira; ndetse no gushyira imbaraga mu bukangurambaga burebana n’iterambere ryuzuye rya muntu, hibandwa cyane cyane ku rubyiruko, abari mu nama bavuze ko   ubukangurambaga bukorwa kugira ngo urubyiruko rumenye Caritas, rumenye indangagaciro zayo, ndetse runitabire ibikorwa by’ubukorerabushake. Ubu bukangurambaga bukorwa mu mashuri, za Kaminuza na Seminari Nkuru, hagamijwe kugira ngo abana n’urubyiruko bakurane umutima w’urukundo no gufasha abandi.

Ku musozo w’iyi nama, abakozi ba Caritas Kibungo bashimye inama nk’iyi, bavuga ko ibitekerezo byaganiriwemo bazagerageza kubishyira mu bikorwa, kugira ngo banoze imikorere.

Nyuma y’inama, habayeho igikorwa cyo gusura ibigo byita ku batishoboye, ari byo Home of Joy (Akarere ka Ngoma ifashwa n’Ababikira b’Abakalikuta (Missionnaires de la Charite), n’Urugo rw’Amahoro rwa Kabarondo rufashwa na Paruwasi n’abakorerabushake. Abakozi ba Caritas Kibungo na Caritas Rwanda baganirije abitabwaho muri ibi bigo, babashimira ukwihangana bagaragaza mu bubabare baba bafite.

Hagamijwe guteza imbere imibereho y’impunzi n’abashakisha ubuhunzi mu Rwanda bagera kuri 50, muri Nzeli 2024, Caritas Rwanda yatangije umushinga w’amezi 4 uzakorera mu nkambi y’impunzi ya Mahama, watewe inkunga n’ikigo cy’Abanyakanada MasterCard Foundation binyujijwe mu Ishami ry’Umuryango w’Abibumbye ryita ku mpunzi HCR mu Rwanda.

Uyu mushinga uzafasha ingo z’Abanyasudani 46, rumwe rw’Abanyetiyopiya, rumwe rw’Abanyafuganisitani, rumwe rw’Abanyapakisitani, na rumwe rw’Abanyacadi.  Ibikorwa by’uyu mushinga bizakurikiza inkingi enye zikurikizwa muri gahunda yo gucutsa abafashwaga (Graduation approach) ari zo kuzamura ubushobozi, kurengera imibereho, iterambere mu bukungu no kuzahura imibereho.

Ku itariki 09/09/2024, abakozi 8 ba Caritas Rwanda bazakora muri uyu mushinga bakoze inama yo kubasobanurira uko umushinga uteye, kugira ngo bazabashe kuwushyira mu bikorwa bawumva neza. Ku munsi wakurikiye (10/09/2024), Caritas Rwanda yahuye n’abafatanyabikorwa bakorera mu nkambi, abahagarariye ibyiciro by’impunzi zizafashwa muri uyu mushinga n’ubuyobozi bw’inkambi ya Mahama.

Muri iyi nama, ibiganiro byibanze ku gusobanura ibikorwa by’uyu mushinga no ku bizagenderwaho mu gutoranya abafatanyabikorwa.  Baba abafatanyabikorwa, abahagarariye impunzi ndetse n’ubuyobozi bw’inkambi ya Mahama bijeje ubufatanye mu ishyirwa mu bikorwa by’uyu mushinga, kugira ngo uzagirire akamaro abo ugenewe guteza imbere.

Abahagarariye ibyiciro by’impunzi zizaterwa inkunga bashimye uyu mushinga ariko bavuga ko umubare ari muto cyane ukurikije abakeneye ubufasha. Abakozi ba Caritas Rwanda babasubije ko muri uyu mushinga w’igerageza hateganijwe gufasha abafatanyabikorwa 50, mu ntangiriro ukaba waragombaga gufasha Abanyasudani bonyine kuko bafite umubare munini mu nkambi (basaga 800) ariko haza kuza igitekerezo cyo kuza gushyiramo n’abandi baturutse mu bindi bihugu, ariko kuko imiryango yabo ari micye, hashyirwamo umubare muto.

Kuva tariki 11 kugeza kuri 12 Nzeli 2024, abakozi ba Caritas Rwanda bafatanyije n’abahagarariye ibyiciro by’impunzi zizafashwa batoranije imiryango 50 izafashwa muri uyu mushinga, bakurikije ibyateganijwe kugenderwaho bazitoranya.

Nyuma yo gutoranywa, abafatanyabikorwa baturutse muri buri muryango bazahugurwa ku gukora amatsinda yo kubitsa no kugurizanya, ibijyanye no gucunga imari, gushinga no gucunga imishinga mito ibyara inyungu, ndetse no kwiga imishinga. Nyuma yaho bazashinga amatsinda yo kubitsa no kugurizanya, bahabwe Frw 800.000 buri wese kugira ngo batangire imishinga mito ibyara inyungu.

Muri gahunda Caritas Rwanda imaze iminsi ikora yo gusura Caritas za Diyosezi hagasuzumwa ishyirwa mu bikorwa ry’imyanzuro y’Inteko Rusange ya Caritas Rwanda ya 2023, ku itariki 9 Nzeli 2024, bamwe mu bakozi ba Caritas Rwanda bakoranye inama n’abayobozi b’amashami ya Caritas Gikongoro ku cyicaro cyayo, baganira ku ngingo zavuzwe hejuru, banasangira ibitekerezo ku bikorwa n’ingamba binyuranye.

Mu gutangira, abayobozi b’amashami yose ya Caritas Gikongoro bagaragaje ibikorwa binyuranye irimo gukora. Mu ishami ryo kwita ku batishoboye n’ubutabazi, hakorwa ubukangurambaga kuri Caritas, kurihira abanyeshuri batishoboye amafaranga y’ishuri no kubakurikirana, gufasha abarwayi bakennye kugera kwa muganga, kwita ku bafite ubumuga, gufasha imiryango ikennye kwiteza imbere, kwita ku bakuze batishoboye bahabwa ibiribwa, imyambaro no kubashakira umusanzu w’ubwisungane mu kwivuza.

Muri Caritas Gikongoro kandi, hatangiye igikorwa cyo kubarura abagororwa baturuka mu maparuwasi, hagakusanywa inkunga bagasurwa n’abantu babiri bahagarariye abandi. Umushumba wa Diyosezi ya Gikongoro, Myr Celestin Hakizimana, yasabye ko iyi gahunda yakwira muri Diyosezi ya Gikongoro yose. Abagororwa bo mu igororero rya Nyamagabe kandi basomerwa Misa buri cyumweru, bagahabwa n’ibyo kurya kuri Noheli.

Bitewe n’uko ubushobozi bwo kugera ku bakeneye ubufasha ari buke, muri Caritas Gikongoro batangiye gahunda bise “Menya Mugenzi wawe”, aho abafashijwe na Caritas baganirizwa, ababyemeye bakagira uruhare mu gutanga umusanzu muto uhoraho wafasha mu kwita ku bandi bakeneye ubufasha.

Mu birebana n’ubuzima, Caritas Gikongoro icunga ibigo nderabuzima 11, aho abakennye cyane bafashwa kwivuza, hakaba n’abishyurirwa umusanzu w’ubwisungane mu kwivuza, gutanga inyunganiramirire, gukangurira no gutanga serivisi zo kuringaniza imbyaro hakoreshejwe uburyo bwa kamere (PFN), na serivisi z’ubusugire bw’ingo.

Mu ishami ry’amajyambere, hari imishinga inyuranye y’ubuhinzi, ariko yibanda ku guteza imbere abahinzi bahereye ku baciriritse. Hari kandi umushinga wo kongerera ubushobozi abahinzi no kunoza imirire ukorera muri Nyaruguru, gutanga imbuto z’indobanure n’amafumbire no guteza imbere ibiti bivangwa n’imyaka bahereye ku biboneka aho batuye.

Muri iri shami kandi hari umushinga wo gutanga amatungo ku batishoboye bakabona ifumbire, no gukora amaziko azigama ibicanwa hagashyirwaho na komite zishobora kuyageza kure.

Mu ishami ry’ubuyobozi n’icungamutungo, Caritas ifite gahunda yo gushaka imishinga iyongerera ubushobozi. Havuzwe kandi ku gutenganya amafaranga ajyanye no kumenyekanisha ibikorwa bya Caritas byanyuzwa mu bitangazamakuru bya Kiriziya Gatorika.

Kuri iyi ngingo, muri iyi nama abakozi ba Caritas Gikongoro bahawe amahugurwa magufi ku buryo bwo kwandika inkuru, ibi bikazabafasha kwandika inkuru zivuye mu bikorwa bya Caritas mu mashami yose, zikanyuzwa mu kanyamakuru ka Caritas Contact / Ihuriro rya Caritas no muri Kinyamateka.

Muri Caritas Gikongoro, kwizihiza umunsi wa Caritas n’umunsi mpuzamahanga w’abakene ntibyajyaga bikorwa muri paruwasi zose 19, ariko uyu mwaka bizakorwa kuko n’Inteko Rusange ya Caritas Gikongoro y’uyu mwaka yabifasheho umwanzuro.

Ubukangurambaga ku kwezi k’urukundo n’impuhwe

Hagamijwe kuzamura umusaruro w’ukwezi k’urukundo n’impuhwe, kugirango haboneke ubufasha bwo kugoboka abafite ubushobozi buke, abakozi ba Caritas Gikongoro bageze mu maparuwasi yose 19 bakora ubukangurambaga. Abagize komite za Caritas kandi bakora ubukangurambaga mu miryangoremezo urugo ku rundi, bahamagarira abantu kwitabira gutanga inkunga y’ukwezi k’urukundo n’impuhwe badatoranije amadini, kuko Caritas nayo ifasha bose nta kuvangura. Muri buri gitambo cya Misa ku cyumweru kandi ubu butumwa buratambuka nyuma y’aho baboneye ibaruwa ya Musenyeri Anaclet Mwumvaneza akaba na Perezida wa Caritas Rwanda.

Hari na gahunda yo gukora ubukangurambaga ku kwezi k’urukundo n’impuhwe mu mashuri ndetse agakangurirwa kuvugurura inzego za Caritas no kuzishyiraho aho zitarashyirwaho. Indi ngamba ni uko mu nama y’umuryango remezo hazajya hatoranywa abafite ibibazo kurusha abandi bagafashwa, ku buryo abandi bazabareberaho, mu gihe cy’ubukangurambaga bikoroha gutanga ubutumwa.

Ku musozo w’iyi nama, abakozi ba Caritas Gikongoro bashimiye inama nk’izi Caritas Rwanda irimo gukorera muri Caritas za Diyosezi, kuko ibitekerezo bivamo bizazifasha kunoza imikorere n’imikoranire.

Nyuma y’inama, abakozi ba Caritas Rwanda na Caritas Gikongoro basuye ikigo kita ku bana bafite ubumuga kitwa Centre Saint François d’Assise Kitabi, kiyobowe n’ababikira b’abapenitente ba Mutagatifu Fransisiko wa Asizi.

Muri gahunda yo gusuzuma ishyirwa mu bikorwa ry’imyanzuro y’Inteko Rusange ya Caritas Rwanda ya 2023 no kungurana ibitekerezo, bamwe mu bakozi ba Caritas Rwanda bakoranye inama n’abakozi ba Caritas Cyangugu bakuriye amashami (Départements) uku itariki 5 Nzeli 2024, ku biro bya Caritas Cyangugu.

Mu birebana n’ubukangurambaga bw’ukwezi k’urukundo n’impuhwe, Caritas Cyangugu yakoranye inama n’abapadiri Aumôniers, hagamijwe kubashishikariza gukora ubukangurambaga kuri uku kwezi k’urukundo n’impuhwe. Batanze kandi ubutumwa bwanditse k’ukwezi k’urukundo n’impuhwe buhamagarira buri wese kwitabira gutanga inkunga. Ubwo butumwa buherekejwe n’ibaruwa isaba ubufasha bwatanzwe hirya hirya no hino aho abantu bakorera, mu bigo by’imari, mu nzu z’ubucuruzi n’ahandi.

Muri iyi nama, abakozi ba Caritas Cyangugu baboneyeho kugaragaza ibikorwa Caritas Cyangugu ikora, birimo: kwishyurira abana amafaranga y’ishuri, kwita ku bafite ubumuga, kubakira abatishoboye, imishinga yo kubakira ubushobozi abatishoboye, imishinga y’urubyiruko no gukurikirana ingo mbonezamikurire.

Muri ibi bikorwa byose Caritas Cyangugu ikangurira abagenerwabikorwa nabo gufasha abandi, urubyiruko by’umwihariko rukaba rwitabira gukora ibikorwa by’urukundo ndetse n’ubukorerabushake. Urugero batanze ni ihuriro ry’urubyiruko riba buri mwaka, aho urubyiruko rwitabiriye rwigomwa ku mafaranga y’urugendo rwahawe rukagura amabati, rugatanga n’umusanzu mu kubakira amazu abatishoboye. Hari kandi n’ibikorwa byo gusura abarwayi bikorwa n’urubyiruko.

Mu rwego rwo kugaragaza ibikorwa bya Caritas, ushinzwe gukusanya amakuru no kuyatangaza muri Caritas Rwanda, nk’uko yabikoze no mu zindi Caritas za Diyosezi, yahuguye abakozi ba Caritas Cyangugu ku buryo bwiza bwo gukora inkuru yanditse. Ibi bizafasha aba bakozi bo mu mashami yose gukora inkuru zizakoreshwa muri Caritas Contact / Ihuriro rya Caritas.

Buri mwaka, Caritas Cyangugu itegura icyumweru cya Caritas, ku munsi wacyo wa nyuma hakabaho kwizihiza umunsi mpuzamahanga w’umukene n’umunsi wa Caritas, abakorerabushake ba Caritas bagashimirwa, hakabaho Misa, gusangira n’abakene no kuremera abakene batoranijwe. Muri iki cyumweru kandi habaho no kuzuza komite za Caritas no gukangurira urubyiruko kwitabira ibikorwa byo kwita ku batishoboye.

Nyuma y’inama, aba bakozi basuye ikigo kita ku bana bafite ubumuga kitwa Centre Saint François d’Assise de Rusizi, kiyobowe n’ababikira b’abapenitente ba Mutagatifu Fransisiko wa Asizi.

Ihuriro ry’Urubyiruko Gatolika (Forum des Jeunes) ribaye ku nshuro ya 21 ryabereye muri Diyosezi ya Ruhengeri kuva ku ya 21 kugeza ku ya 25 Kanama 2024, rihuza urubyiruko rusaga 5.000 ruturutse mu Rwanda na Repubulika Iharanira Demokarasi ya Congo. Insanganyamatsiko y’ihuriro ry’uyu mwaka yagiraga iti: “Kwishimira mu Kwemera”. Uyu mwaka, iri huriro ryabaye akarusho kuko ryahuriranye no kwizihiza yubile y’impurirane, irimo Yubile y’imyaka 2025 y’ugucungurwa kwa bene muntu na Yubile y’imyaka 125 Inkuru nziza imaze igeze mu Rwanda.

Ihuriro ry’Urubyiruko Gatolika 2024 ryabaye urubuga rwo gukuza ukwemera, uburere bw’inyigisho ku mahame y’ukwemera kwa Kiliziya Gatolika, no kongerera ubushobozi urubyiruko. Ubwo iri huriro ryabaga, buri munsi habayeho igitambo cya Misa, habaho umwanya wo gusenga, no gusangira ibitekerezo, byose bigamije kwegereza Yezu Kristu urubyiruko rwitabiriye.

Kwigisha hagamijwe ubuzima bufite intego no gusabana n’abandi

Inyigisho ku mahame y’ukwemera kwa Kiliziya Gatolika n’inyigisho mbonezamubano ni byo iri huriro ryibanzeho. Binyuze mu mahugurwa n’ibiganiro nyunguranabitekerezo, urubyiruko rwahawe ubumenyi bukenewe kugira ngo rubashe kugendana n’igihe mu buryo bwiza. Izi nyigisho zashimangiye akamaro ko kugira indangagaciro Gatolika, hagamijwe kurera igisekuru kidashinze imizi mu kwemera gusa, ahubwo gifite n’inshingano zo gusigasira imyitwarire n’umuco byiza.

Usibye inyigisho z’ukwemera n’inyigisho mbonezamubano, ihuriro ryabaye umwanya wo gusabana no guhuza ibikorwa. Urubyiruko rwo muri Diyosezi zitandukanye rwagize amahirwe yo gusabana, kungurana ibitekerezo, no kubaka umubano. Ubu busabane bwatumye habaho ubumwe no kwisanga mu muryango wa Kiliziya, bishimangira igitekerezo cy’uko Kiliziya ari umuryango ushyigikira ukanita ku bana bayo.

Kongerera imbaraga urubyiruko binyuze mu bikorwa byo kwiteza imbere

Binyuze muri Gahunda yayo y’Urubyiruko, Caritas Rwanda yateguye imurikabikorwa rito aho abitabiriye imishinga ya Gera ku Ntego na Youth For Youth berekanye imishinga mito bakora ibyara inyungu. Iyi mishinga yagaragaje uburyo urubyiruko rushobora gukoresha amahirwe ahari rukagira imibereho myiza. Uretse gukangura ibitekerezo by’urubyiruko rwitabiriye, iri murikabikorwa ryatanze amakuru ku gutangiza no gucunga imishinga mito ibyara inyungu, mu rwego rwo gukangurira urubyiruko gutera intambwe mu kwigira.

Ihuriro ry’ejo hazaza

Ihuriro ry’Urubyiruko Gatolika rya 21 ryabaye uruhurirane rwo kwiga, kwidagadura no gukangura ibitekerezo, rikaba ryaragaragayemo n’ibindi bikorwa birimo kungurana ibitekerezo ku bijyanye n’umuco, imikino ngororamubiri, ibiganiro nyunguranabitekerezo n’ibindi.

Mu muhango wo gusoza iri huriro, witabiriwe n’Abepiskopi Gatolika, Minisitiri w’Urubyiruko n’Ubuhanzi Dr. Utumatwishima Jean Nepo Abdallah, Guverineri w’Intara y’Amajyaruguru, n’abandi banyacyubahiro; Myr Papias Musengamana Umushumba wa Diyosezi ya Byumba akaba na  Perezida wa CEPJ, bashimiye CRS Rwanda na Caritas Rwanda ku ruhare bagize mu gutegura iri huriro ry’urubyiruko ndetse n’inkunga bakomeje gutera muri Gahunda y’urubyiruko. Minisitiri w’Urubyiruko n’Ubuhanzi, wari umushyitsi mukuru mu ijambo rye yashimye CRS Rwanda na Caritas Rwanda nk’abafatanyabikorwa b’ingenzi mu bikorwa byo kongerera ubushobozi urubyiruko.

Ihuriro ry’Urubyiruko Gatolika rya 21 ntiryari ibirori gusa; ahubwo ryabaye umusemburo w’impinduka ku bantu bose baryitabiriye. Binyuze mu gukuza iterambere mu kwemera n’ubushobozi bufatika, ihuriro ryashyizeho urufatiro rukomeye rw’ejo hazaza h’urubyiruko Gatolika mu Rwanda.

 

NDAMUKUNDA Olivier

Umuhuzabikorwa wa Gahunda y’Urubyiruko

Caritas Rwanda

Muri gahunda Caritas Rwanda imaze iminsi ikora yo gusura Caritas za Diyosezi, hagasuzumwa ishyirwa mu bikorwa ry’imyanzuro y’Inteko Rusange ya Caritas Rwanda ya 2023 irebana n’ishami ryo kwita ku batishoboye n’ubutabazi, ndetse no gusangira ibitekerezo binyuranye, bamwe mu bakozi ba Caritas Rwanda bakoranye inama n’abakozi ba Caritas Kabgayi kuri uyu wa kane tariki 22/08/2024.

Afungura inama ku mugaragaro, Padiri Gasasira Jean Berchmans yibukije ko kimwe n’izindi Caritas za Diyosezi, Caritas Kabgayi iri mu muryango mugari wa Caritas Rwanda, ashima uburyo Caritas Rwanda ihuza ibikorwa bya Caritas za Diyosezi ndetse n’inama nziza itanga kugira ngo imirimo irusheho kugenda neza.

Abari mu nama baganiriye ku buryo ibikorwa bya Caritas byarushaho gutangazwa binyuze mu bitangazamakuru bya Kiliziya Gatorika n’akanyamakuru ka Caritas Rwanda kitwa Caritas Contact/Ihuriro rya Caritas. Aha baboneyeho umwanya wo kwigira hamwe uburyo bwiza bwo gukora inkuru yanditse.

Kwizihiza umunsi wa Caritas n’umunsi mpuzamahanga w’umukene

Muri zone ya Caritas Kabgayi, mu kwizihiza umunsi mpuzamahanga w’umukene hatangwa ubutumwa hirya no hino muri za paruwasi, paruwasi zigafasha bamwe mu bakene bazirimo. Buri paruwasi igena uko izabikora bitewe n’ubushobozi ariko kugeza ubu si zose zirabasha guhimbaza uwo munsi mu buryo buteguye. zibasha gufasha abakene.

Ku birebana no kwizihiza umunsi wa Caritas, Caritas Kabgayi itegura icyumweru cyo gufasha abatishoboye kibabo ibikorwa binyuranye nko kubaha umubyizi, kubaha ibyo kurya, kububakira n’ibindi, bigakorwa ku rwego rwa paruwasi.  Gusoza iki cyumweru bihuzwa no kwizihiza umunsi wa Caritas, bagashimira abakoreye Caritas batakibirimo kubera iza bukuru, abitabye Imana bagasabirwa Misa. Ibi biba uburyo bwo kwisuzuma no gufata ingamba zo mu gihe kiri imbere. Abakozi ba Caritas Kabgayi bavuze ko bagiye gushyira imbaraga mu kwizihiza uyu munsi wa Caritas.

Gukangurira urubyiruko kwitabira ubukorerabushake bwa Caritas

Mu rwego rwo gukangurira urubyiruko kwitabira kuba abakorerabushake ba Caritas, Caritas Kabgayi ishishikariza abagize komite za Caritas muri za paruwasi gusura ibigo by’amashuri bagakora ubukangurambaga, byibura buri kigo kigasurwa rimwe mu mwaka. Jean Népomuscène Hakizimana, ukuriye ishami ryo kwita ku batishoboye muri Caritas Kabgayi yagize ati: “Twifuza ko bazajya babishyira mu iteganyabikorwa, bakabafasha gushyiraho komite”.

Ukwezi k’urukundo n’impuhwe

Mu gukora ubukangurambaga bw’ukwezi k’urukundo n’impuhwe, abakozi ba Caritas Kabgayi bageze muri za paruwasi zose batanga ubutumwa, ubu bukangurambaga bukaba bwarahawe izina rya “Twese Tujyanemo”.

Uretse ubukangurambaga muri paruwasi, ubutumwa bushishikariza buri wese gutanga umusanzu mu kwezi k’urukundo n’impuhwe bucishwa no kuri radiyo “Ijwi rya gare” na radiyo yo mu isoko.

Abakozi ba Caritas Kabgayi kandi bakoze urugendoshuri muri Diyosezi ya Ruhengeri, kugira ngo bige uko Caritas ya Ruhengeri yakoze ubukangurambaga mu kwezi k’urukundo n’impuhwe umwaka ushize, ahakusanyijwe Frw 25.198.908.

Mu gusoza iyi nama, Padiri Gasasira Jean Berchmans yavuze ko Diyosezi ya Kabgayi yashyizeho Komisiyo yo kwita ku bantu bafite ubumuga, hagamijwe kubasubiza agaciro, kuko hari igihe imishinga ibitaho irangira, ariko kuba iyi komisiyo yaragiyeho, kubitaho bizoroha.  Padiri Jean Berchmans yanagarutse ku ntego ya Caritas agira ati: “Twifuza ko umukene yagira ubuzima nk’ubw’abandi akagira icyubahiro nk’icy’abandi, akaba ari yo mpamvu Caritas iriho. Ni urwo rugamba tugomba kurwana dufatanije twese”.

Nyuma y’iyi nama, abakozi ba Caritas Kabgayi na Caritas Rwanda basuye Home Saint Joseph Kabagayi y’Abizeramariya, yita ku bakuze batishoboye. Aba batanze ubuhamya bukora ku mutima, bavuga uko bahageze bameze nabi, bakitabwaho bagakira indwara zo ku mubiri n’ibikomere byo ku mutima.

Muri iki gikorwa, Caritas Kabgayi yashyikirije inkunga y’ibiribwa Home Saint Jean Kabgayi, igenewe abafashirizwa muri iki kigo.

Ku itariki 12 na 13 Kanama 2024, abakuriye ishami ry’imiyoborere n’icungamutungo n’iryo gufasha abatishoboye n’ubutabazi muri Caritas za Diyosezi na Caritas Rwanda bakoranye inama isuzuma ishyirwa mu bikorwa ry’ibyari biteganijwe kuva muri Mutarama kugeza muri Kamena 2024.

Nyuma yo gusuzuma ibyakozwe abari mu nama basanze ibyinshi byarashyizwe mu bikorwa, ibitarakozwe bikazashyirwamo imbaraga mu mezi asigaye ngo umwaka urangire.

Iyi nama yinjira muri gahunda yo gusuzuma ishyirwa mu bikorwa rya Gahunda y’ibikorwa ya Caritas Rwanda 2020-2025, ndetse no gutangira gutekereza ku bizashyirwa muri gahunda ikurikira ya 2025-2030.

Muri iyi nama kandi abayobozi bakuriye za Caritas za Diyosezi na Caritas Rwanda bagize umwanya wo kuganira, basaba ko hajya hakorwa raporo zitanga amakuru ahagije ku bafata ibyemezo mu ishami ry’imiyoborere n’icungamutungo, gushyira imbaraga mu guhanahana amakuru ku gihe, kongerera ubushobozi abakozi no kubashishikariza kurushaho kugira umutima w’urukundo n’impuhwe.

Hagamijwe gufasha urubyiruko rugera kuri 200 kwiga amashuri y’imyuga, ku wa 6 Kanama 2024 Fondasiyo ya BK (BKF) n’abafatanyabikorwa bashyira mu bikorwa gahunda ya Igire bashyize umukono ku masezerano y’ubufatanye, iki gikorwa kikaba cyarabereye mu Ubumwe Grande Hotel i Kigali.

Urubyiruko 200 ruzafashwa ni urwitabwaho na gahunda za OVC (imfubyi n’abana bo mu miryango yugarijwe n’ibibazo na DREAMS (abangavu n’urubyiruko rw’abakobwa).

Iyi gahunda izashyirwa mu bikorwa mu turere dutanu ari two Muhanga, Kayonza, Kicukiro, Rwamagana na Nyamasheke. Utu turere twatoranijwe kuko dufite umubare munini w’urubyiruko rukeneye kwiga imyuga (TVET), kandi benshi ni abangavu n’urubyiruko rw’abakobwa.

Guhitamo abaziga imyuga bizakorwa na Fondasiyo ya BK ifatanije n’abayobozi b’inzego z’ibanze kugira ngo ababikwiriye abe ari bo bahabwa amahirwe kandi ntibahurirweho n’abafanyabikorwa benshi.

Igihe cyo kwiga imyuga kizaba kingana n’amezi 12 arimo 6 yo kwiga, 3 yo kwimenyereza umwuga n’andi 3 yo kugenzura ibyakozwe no gutanga raporo.

Igire ni gahunda y’imyaka 5 (2022-2027) iterwa inkunga na Gahunda ya Perezida wa Amerika yo kurwanya SIDA (PEPFAR), binyuze mu kigega cy’Abanyamerika gitsura amajyambere (USAID). Igire ishyirwa mu bikowa n’abafatanyabikorwa batanu ari bo FXB, Duhamic ADRI, YWCA, AEE na Caritas Rwanda.

Ku bufatanye n’Akarere ka Burera, ku ya 30 Nyakanga 2024, Gahunda ya USAID Gikuriro Kuri Bose yakiriye abashyitsi baturutse mu bunyamabanga bwa Gahunda y’Akarere yo kurandura imirire mibi hamwe n’itsinda rishinzwe imirire rya USAID Gikuriro Kuri Bose riturutse mu turere 9. Uru ruzinduko rwateguwe mu rwego rwo kungurana ibitekerezo ku dushya n’ibikorwa byiza byo kurwanya igwingira no guteza imbere uburezi budaheza mu bana bato byakozwe na gahunda ya USAID Gukuriro Kuri Bose mu Karere ka Burera.

Iri tsinda ryasuye ikigo cyita ku mirire cyo mu Murenge wa Rugarama, rinahabwa ibisobanuro ku mushinga wo gukurikirana imikurire y’abana, aho abana bahuye n’imirire mibi bitabwaho bigizwemo uruhare n’abaturage, Gahunda y’Umurenge yo Kurandura Imirire mibi n’imikurire y’abana (SPEM-CD) n’abafatanyabikorwa barimo USAID Gikuriro Kuri Bose. Ikigega cyo Kondora umwana ni cyo gitanga amafaranga yo kugura ibiribwa bikenewe mu kwita ku bana bagize imirire mibi.

Aba bashyitsi basuye kandi Umudugudu wa Kabindi w’intangarugero mu kugaburira abana indyo yuzuye intungamubiri mu ngo mbonezamikurire y’abana bato (ECD), iki gikorwa kikaba gikuriwe n’abajyanama b’ubuzima bafatanije n’ababyeyi b’urumuri. Abanyamuryango b’ishuri mbonezamikurire ry’uyu mudugudu bose uko ari 30 bafite inkoko zitera amagi, ibi bikaba bigamije ko abana bato babona intungamubiri z’ibikomoka ku matungo, zikenewe mu mikurire yabo n’imibereho myiza muri rusange.

Ubwo aba bashyitsi basuraga urugo mbonezamikurire rwa Gatovu, bagiranye ibiganiro n’ababyeyi kuri serivisi zihatangirwa ndetse n’umusanzu wabo mu gutuma zizakomeza gutangwa neza no mu gihe umushinga uzaba warasoje ibikorwa.

Ku itariki 26/07/2024, umushinga wa PRM/PAC wari umaze imyaka itatu ushyirwa mu bikorwa mu nkambi ya Kiziba wasojwe ku mugaragaro, nyuma yo gufasha abafatanyabikorwa 580 gukora imishinga ibabyarira inyungu kugira ngo bave mu bukene biteze imbere.

Uyu mushinga PAC watangiye gukorera mu nkambi ya Kiziba ku itariki ya 1 Kanama 2021, ibikorwa byawo bikaba byarasojwe kuri 31 Nyakanga 2024.

Ibikorwa by’umushinga byari biteganijwe kugera ku bafatanyabikorwa 700 harimo 500 b’impunzi na 200 b’Abanyarwanda baturiye inkambi. Bitewe na gahunda yo kwimurira impunzi mu gihugu cya 3, abagezweho n’ibikorwa ni 580 kuko harimo abagiye hanze.

Nyuma yo gutoranywa, abafatanyabikorwa bahawe amahugurwa atandukanye, bahabwa inkunga ya Frw 800.000 buri wese kugira ngo bakore imishinga mito ibabyarira inyungu, kandi bakangurirwa kwibumbira mu matsinda yo kubitsa no kugurizanya kugira ngo barusheho kwiteza imbere. Amatsinda agera kuri 24 (17 yo mu nkambi ya Kiziba na 7 yo hanze y’ inkambi) ni yo yashinzwe, agizwe n’abanyamuryango 580. Kugeza uyu munsi amafaranga angana na 113.661.003 Frw yanyuze mu ntoki z’aya matsinda.

Imishinga yashyizwe mu bikorwa n’abafatanyabikorwa b’umushinga irimo iy’ubuhinzi n’ubworozi 259, iy’ubucuruzi 329, ijyanye n’ubumenyingiro 35, ijyanye no gutwara abantu kuri moto 15, na 20 ijyanye no gutanga serivisi zinyuranye (mobile money, serivisi z’ irembo).

Mu kwiteza imbere abafatanyabikorwa b’umushinga wa PRM/PAC baguze amatungo arimo inka 130, ingurube 235, ihene 273, inkoko 256, abandi 57 biyubakira amazu mu rwego rwo kwibonera aho kuba hababereye.

Mu ijambo yagejeje ku bari bitabiriye umuhango wo gusoza ibikorwa by’umushinga PRM/PAC mu nkambi ya Kiziba, Umunyamabanga Mukuru wa Caritas Rwanda, Padiri Oscar Kagimbura, yashimiye Leta y’u Rwanda kuko yakoze ibishoboka byose impunzi zikabona umutekano, zikabasha no gukora ibiziteza imbere, anashima ubufatanye bw’inzego zose mu gufasha impunzi.

Umushinga PRM/PAC washyizwe mu bikorwa na Caritas Rwanda mu nkambi za Kiziba na Nyabiheke, ku bufatanye na World Vision Rwanda, ku nkunga y’ ikigo cy’Abanyamerika gishinzwe guteza imbere impunzi n’abimukira (BPRM). Intego y’uyu mushinga yari iyo gufasha impunzi n’Abanyarwanda baturiye inkambi kwivana mu bukene bukabije.