Amatsinda y’urubyiruko 30 kuri 216 yo mu turere twa Ngoma, Kayonza na Rwamagana ni yo yatsinze irushanwa rya Compete To Grow ryari rigamije kongerera ubushobozi imishinga y’urubyiruko, guhanga imirimo no kwiteza imbere, ryatewe inkunga na CRS Rwanda, ibinyujije mu mushinga Gera Ku Ntego ushyirwa mu bikorwa na Caritas Kibungo ifatanije na Caritas Rwanda. Iki gikorwa cyabaye kuri 23 (Ngoma), 28 (Kayonza) na 30 Nyakanga 2026 (Rwamagana).
Amatsinda yabaye aya mbere ni Icyizere rikora ubuhinzi bw’urusenda no kurutunganya (Ngoma), Umurava ryorora inkoko rikanakora ifu y’amagi n’iy’inyama (Kayonza), na Terimbere rihinga imiteja rikayohereza hanze y’u Rwanda (Rwamagana). Buri tsinda muri aya ryahembwe Frw 2.500.000.
Mu kiganiro yagiranye n’urubyiruko rwitabiriye irushanwa mu Karere ka Ngoma, Chandra Kumud, Umuyobozi wa CRS Rwanda, yabashishikarije gukoresha neza amahirwe n’ubufasha bahawe: “Mubikoreshe neza kugira ngo mukomeze guteza imbere imishinga yanyu. Ariko ntimugomba kugarukira aha: ahubwo iyi ni intangiriro y’urugendo rwanyu. Mukomere ku ntego mwiyemeje.”
Urubyiruko rwasabwe kubyaza umusaruro amahirwe rubona
Mu birori bya nyuma by’irushanwa muri buri Karere, abahagarariye amabanki atandukanye bagejeje ku rubyiruko serivisi z’imari atanga, banasobanura amahirwe ahari yo kubona igishoro no kwagura imishinga. 
Abayobozi b’uturere bitabiriye ibi birori muri buri karere na bo bashishikarije urubyiruko gukoresha neza amahirwe n’ubufasha ruba rwahawe binyuze muri gahunda zitandukanye, gukomeza kunoza imishinga yarwo, guteza imbere imibereho yarwo no kugira uruhare mu iterambere ry’abaturage. 
Mu matsinda 216 y’urubyiruko yitabiriye irushanwa rya Compete to Grow, 64 ni ayo muri Ngoma, 79 akaba ayo muri Kayonza na 73 yo muri Rwamagana. 
Amatsinda 10 yatsinze iri rushanwa muri buri karere yabonye ibihembo biri hagati ya Frw 500.000 na Frw 2.500.000, kugira ngo akomeze kwagura imishinga yayo no guhanga imirimo. Ibihembo byose hamwe byatanzwe mu turere 3 bingana na Frw 42.600.000.
