Blog

Ku wa gatatu tariki 28 Gicurasi 2025, bamwe mu bakozi ba Caritas Rwanda basuye Seminari Nkuru ya Nyakibanda baganira n’abafaratiri ndetse n’Abayobozi babo ku butumwa bwa Caritas bugamije gufasha muntu mu buryo bwuzuye.

Mu kiganiro cyatanzwe na Soeur Gaudiose Nyiraneza ushinzwe ubukangurambaga mu Ishami ryo kwita ku batishoboye muri Caritas Rwanda, yagaragaje ishusho ya Caritas n’ibikorwa ikora binyuze mu mashami atatu ari yo Kwita ku batishoboye, Ubuzima n’Amajyambere, asobanura ko byose bikorwa hagamijwe kugarurira agaciro umukene n’undi ubabaye.

Soeur Gaudiose kandi yasobanuye ibijyanye n’ukwezi k’urukundo n’impuhwe (ukwezi kwa 8) aho abakirisitu n’abandi bantu b’umutima mwiza bakusanya inkunga yo gufasha abakene, abakangurira kurushaho kwitabira icyo gikorwa no kubikangurira abo bagezaho ubutumwa. Soeur Gaudiose yanavuze ku munsi mpuzamahanga w’abakene aho usanga nk’umuyobozi wa Caritas n’abandi basangira n’abakene, ibi bikaba ari byo Papa Fransisiko yifuzaga ashyiraho uyu munsi: gusubiza agaciro umukene mu bikorwa 3 by’ingezi: Gusangira igitambo cya Misa, Gusangira ifunguro n’Abakene no kubaremera.

Nyuma y’iki kiganiro, abafaratiri babajije ibibazo byinshi byibanze ku gufasha umukene hagamijwe kwigira, ndetse n’ibijyanye kugabanuka no guhagarara kw’inkunga zituruka hanze.

Mu ijambo yagejeje ku bari bitabiriye ubu bukangurambaga, Padiri Michel Nsengumuremyi umurezi mu Iseminari Nkuru ya Nyakibanda akaba ashinzwe ibya roho yashimiye Caritas Rwanda kuba ibazirikana ikaza gukora ubukangurambaga nk’ubu mu rugo rwa Nyakibanda, kuko bibafasha gukomeza mu murongo mwiza wo gufasha abatishoboye no kuzabikomeza mu butumwa bwa gisaserdoti.

Abafaratiri bari mu Iseminari Nkuru ya Nyakibanda basanzwe bakora ibikorwa by’urukundo

Mpayimana Fabien, umufaratiri wa Diyosezi ya Gikongoro akaba anashinzwe  guhuriza hamwe ibikorwa by’imuryango y’Agisiyo Gatorika Actions Catholiques muri Seminari Nkuru ya Nyakibanda yasobanuye ko abafaratiri bafatanije n’inzego z’ibanze basanzwe bakora ibikorwa by’urukundo birimo kubakira abatishoboye binyuze muri bikorwa bya “apostolat” bakora buri wa mbere ikigoroba, gukusanya inkunga y’amafaranga bakishyurira abana bo mu miryango itishoboye ibikoresho by’ishuri no gukusanya inkunga bagafasha abari mu magororero (imyenda, ibikoresho,…)

Mu bijyanye no kubakira abakene, abafaratiri bakora umuganda bakubaka ariko nk’uko babisobanura, bitewe n’amikoro macye bagira imbogamizi yo gukora amasuku kugira ngo inzu ise neza nko gushyiramo sima. Jean Damascène Uwiringiyimana, umudiyakoni wa Diyosezi ya Nyundo yagize ati: “Ubushobozi buba bucye. Iyo batwitabaje dutanga ubutabazi butubangukiye dukoresheje amaboko yacu, tukagira imbogamizi yo kubona amikoro ahagije ngo inzu tuyikore neza uko bikwiye. Twabonye bibaye byiza habonetse ubushobozi bwo kugura sima abubakiwe bagatura ahantu hasa neza ntibagire iryo pfunwe byaba ari byiza kurushaho”.

Aba bafaratiri n’abayobozi babo bakangurira buri muntu wese gukora ibikorwa by’urukundo kuko Nyagasani Yezu abihamagarira buri wese ati: “Kuko nashonje mukamfungurira; nagize inyota mumpa icyo kunywa; naje ndi umugenzi murancumbikira; nari nambaye ubusa muranyambika; nari ndwaye muransura; nari imbohe muza kundeba”. (Matayo 25:35-36).

Ubukangurambaga nk’ubu Caritas Rwanda ibukora muri Seminari Nkuru,no muri za Kaminuza. Bukorwa kandi binyuze no mu bitangazamakuru binyuranye bya Kiriziya. Caritas Rwanda irateganya no kwagura ibi bikorwa igakangurira abantu bose kugira umutima wo kwitangira abakene n’abandi bababaye, binyuze ku bitangazamakuru binyuranye, ibasanze aho bakorera n’ahandi hahurira abantu benshi.

Abahagarariye ibigo bya Kiliziya Gatolika mu Rwanda basaga 50 bahawe amahugurwa ku bijyanye n’amahame agenga imikoreshereze myiza y’ubwenge buhangano, yatanzwe n’ikigo EAiD (Ethical Artificial Intelligence for Human Development) giharanira imikoreshereze myiza y’ubwenge buhangano hagamijwe iterambere rya muntu gifatanije na Caritas Rwanda. Aya mahugurwa yabereye kuri Centre Saint Vincent Pallotti Gikondo, kuva kuri 13 kugeza kuri 14 Gicurasi 2025, akaba yari agamije gufasha abayitabiriye gusobanukirwa ubwenge buhangano (icyo ari cyo), kugira ngo babwifashishe mu kazi kabo ariko bikozwe mu buryo bwiza.

Mu ijambo rifungura amahugurwa ku mugaragaro, Padiri Oscar Kagimbura, Umunyamabanga Mukuru wa Caritas Rwanda, yagaragaje ko ubwenge buhangano ari kimwe mu bigize ubuzima bwa buri munsi, bukaba burimo guhindura cyane sosiyete, ibigo, ndetse n’ubuzima bwite bw’abantu. Yongeyeho ko muri urwo rwego, ari ngombwa ko Kiliziya, mu butumwa bwayo bw’iyogezabutumwa, igira uruhare rugaragara mu mikoreshereze yabwo, itanga ubushishozi bushingiye ku ndangagaciro gatolika kandi ikagira uruhare mu iterambere ry’ubwenge buhangano mu bikorwa biteza imbere muntu.

Padiri Oscar yagize ati: “Turi mu gihe gikomeye, aho gutekereza kuri tewolojiya n’amahame y’imyitwarire bigomba guhuzwa no guhanga udushya mu ikoranabuhanga kugira ngo ubwenge buhangano bukoreshwe mu nyungu z’abatishoboye bababaye kurusha abandi, cyane cyane abakene, abarwayi, impunzi, ndetse n’abandi bose Kiliziya iharanira kwitaho mu rukundo n’impuhwe.”

Mu gusoza, Padiri Oscar Kagimbura yashimangiye ko buri wese agomba guhora azirikana ihame shingiro ry’imyitwarire gatolika: ubwenge buhangano ntibugomba gusimbura abantu. Ibyemezo by’ingenzi birebana n’ubuzima bwa muntu n’agaciro ke bigomba buri gihe gufatwa n’abantu, bamurikiwe n’umutimanama wabo ndetse n’ukwemera kwabo.

Amahame agenga imikoreshereze y’ubwenge buhangano yashyizweho na Roma

Mu rwego rwo guteza imbere imyitwarire myiza y’ubwenge buhangano binyuze mu kwimakaza inshingano zihuriweho n’imiryango mpuzamahanga, za guverinoma, ibigo, n’abikorera ku giti cyabo, Kiliziya yashyizeho amahame atandatu yo kuyobora abo bose mu bijyanye no gushyiraho no gukoresha neza ubwenge buhangano. Ayo mahame ni aya akurikira:

1. Gukorera mu mucyo: ubwenge buhangano bugomba gusobanurirwa abari mu bikorwa bijyanye nabwo.
2. Kudaheza: ibikenerwa n’abantu bose bigomba kwitabwaho kugira ngo buri wese abwungukiremo kandi abantu bose bagomba koroherezwa mu buryo bwose bushoboka kugira ngo batange ibitekerezo banatere imbere.
3. Kubazwa inshingano: abategura kandi bagatuma ubwenge buhangano bugera ku bandi bagomba gukorana ubushishozi no Gushaka irindi jambo riri appropriate
4. Kutabogama: kwirinda gushyiraho cyangwa gukora ugendeye ku bitekerezo bibogamye, bityo ukabungabunga ubutabera n’agaciro ka muntu.
5. Kwizerwa: Sisitemu y’ubwenge buhangano igomba kuba ishobora gukora neza.
6. Umutekano n’ibanga: Sisitemu y’ubwenge buhangano igomba kubahiriza umutekano no kubaha imibereho bwite bw’abayikoresha.

Binyuze mu matsinda atandatu, abitabiriye amahugurwa basesenguye uburyo buri hame ryakoreshwa muri Afurika, ibiri mu muco wayo bishobora kuriteza (ihame) imbere cyangwa kurushaho kurisobanura, n’ibintu byihariye bikwiye guhinduka kugira ngo rirusheho kugira akamaro. Buri tsinda ryari ryahawe kwiga ku ihame rimwe, rigakora imyanzuro riyisangiza abandi.

Iyi myitozo yari igamije gufasha abahagarariye ibigo bya Kiliziya Gatolika gusobanukirwa neza uko ubwenge buhahano bukora no kubukoresha mu bushishozi hagamijwe inyungu z’abantu ibigo bakorera byitaho.

Amahugurwa kandi yabaye umwanya wo kumenya uburyo bumwe mu bwenge buhangano bukora, harimo ChatGpt (ubwenge buhangano bushobora kuganira n’umuntu, kwandika, no gukora imirimo imwe n’imwe bugendeye ku cyo umuntu yabusabye), Perplexy AI (butanga ibisubizo birasa ku ntego bukoresheje ishakisha kuri interineti), na Akinator (umukino ukubwira abantu, ikintu cyangwa inyamanswa byamenyekanye ku rwego rw’isi, ugendeye ku bibazo ugenda ukubaza).

Aya mahugurwa yateguwe ku nkunga ya Vatikani, atangwa n’ikigo cya EAiD, giharanira guteza imbere ishyirwa mu bikorwa ry’ubwenge buhangano mu buryo bwiza, hagamijwe kuzamura imibereho y’abatishoboye bababaye kurusha abandi mu bihugu biri mu nzira y’amajyambere.

Ku itariki 24 Werurwe 2025, urubyiruko rwibumbiye mu itsinda ryo kubitsa no kugurizanya “Imbaduko y’Iterambere – Murambi” rifashwa n’umushinga wa Gera Ku Ntego (GKN) rwubakiye inzu Nteziryayo Eric, umugabo wubatse ufite n’abana babiri, akaba atuye mu Mudugudu wa Murambi, Akagali ka Ntanga, Umurenge wa Mugesera mu Karere ka Ngoma ho mu nNtara y’Iburasirazuba.

Igitekerezo cyo kubakira Eric cyatanzwe n’umwe mu banyamuryango b’iri tsinda, abandi basanga ni cyiza baragishyigikira, 12 mu banyamuryango bajya kumwubakira ariko bafashijwe n’abandi 5 bo mu rubyiruko rw’aho hafi rutari mu itsinda. Eric wubakiwe yari aherutse gusenyerwa   n’imvura, igisenge kiraguruka n’inkuta ziragwa.

Inzu yubatswe ingana na metero 4 kuri 5, ikaba ifite ibyumba bibiri byo kuraramo, uruganiriro n’ikirongozi. Isakajwe amabati 12. Mu kuyubaka, uru rubyiruko nta bindi bikoresho rwaguze uretse imbingo, ahubwo rwatanze umuganda wo gucukura itaka, kuvoma amazi, gukata urwondo, guparata no guhoma inkuta. Ibyakozwe byose hamwe bifite agaciro n ka Frw 78.000.

Nyuma y’iki gikorwa, umufashamyumvire w’uyu mushinga (GKN) mu mMurenge wa Mugesera Niyimenya Florence yashimiye abitabiriye anabasaba gukomeza gukora ibikorwa by’urukundo no kwibumbira mu matsinda yo kwizigama no kugurizanya mu rwego rwo kugabanya umubare w’urubyiriko rwishora mu biyobyabwenge n’izindi ngeso mbi, dore ko urubyiruko ari imbaraga z’igihugu zubaka kandi vuba.

Umushinga w’urubyiruko Gera Ku Ntego (GKN) uterwa inkunga na CRS, ukaba ugamije gushimangira inzira irambye yo guteza imbere urubyiruko hitabwa ku bikenewe, amahirwe, ndetse n’ibyihutirwa mu Rwanda.

Uyu mushinga ushyirwa mu bikorwa na Caritas 4 za Diyosezi (Butare, Cyangugu, Byumba na Nyundo zone Gisenyi) ku bufatanye n’ihuzabikorwa rya Caritas Rwanda, kandi ugashingira ku mubano usanzweho n’abafatanyabikorwa barimo Leta, abikorera, kugira ngo bahuze imbaraga mu gutuma haboneka imari no kwihangira imirimo, ari zo nzitizi zikomeye mu guhanga imishinga mito n’iciriritse ndetse no guteza imbere urubyiruko mu Rwanda.

Mu rwego rwo kubafasha kuva mu bukene no kwigira, Caritas Rwanda ibinyujije mu mushinga wayo wa Graduation uterwa inkunga na HCR, yateye inkunga impunzi 50 z’Abanyasudani n’abandi baba mu nkambi y’impunzi ya Mahama ibaha amahugurwa atandukanye, arimo gutangiza no gucunga amatsinda yo kuzigama no kugurizanya, inaha buri wese Frw 800.000, kugira ngo babashe gushyira mu bikorwa imishinga yabo ibabyarira inyungu.

Nyuma y’amahugurwa, izi mpunzi zashinze amatsinda yo kuzigama no kugurizanya abiri. Buri tsinda rya rigizwe n’abanyamuryango 25, rimwe rikaba ririmo abagore, irindi rikaba ir’abagabo. Abanyamuryango bahura kenshi mu itsinda mu gihe bumvikanyeho kugira ngo bizigame, abashaka inguzanyo zo gukoresha mu mishinga yabo ibyara inyungu cyangwa mu gukemura ibibazo byabo byihariye bakazihabwa.

Mu mpera za Werurwe 2025 (nyuma y’amezi 4 batangiye kwizigama mu matsinda), bamaze kugira ubwizigame Bungana na Frw 1.448.350 kandi bamenye gukoresha inguzanyo zo mu itsinda. Kuri ubu, inguzanyo zose zahawe abanyamuryango zingana na Frw 1.092.200.

Ubuhamya bw’umwe mu Banyasudani bari mu matsinda

Amatsinda yo kwizigama no kugurizanya azwi ku mpine SILC, agira uruhare runini mu guteza imbere ubukungu no kwigira ku mpunzi n’abasaba ubuhunzi. Aya matsinda ameze nk’irembo ryo kwiteza imbere mu bukungu, afasha abantu kwzigamira, kubona inguzanyo yo mu itsinda, no kwigira.

Ibrahim Altayib Namriyn ni umwe mu banyamuryango b’itsinda ryitwa Entrepreneur Passages SILC Group, rigizwe n’abagabo b’Abanyasudani n’izindi mpunzi nke. Iri tsinda ryagize uruhare runini mu kwagura ubucuruzi bwe. Ibrahim abisobanura muri aya magambo: “Kuba muri iri tsinda ni ingenzi cyane kuri njye. Aho kuguza amafaranga inshuti zanjye, natse inguzanyo ya Frw 60.000 muri tsinda ngura imiti yica udukoko. Nayishyuye nongeyeho inyungu nke. Ubu ndateganya kongera gusabamo inguzanyo yisumbuyeho kugira ngo nagure umushinga wanjye”.

Nyuma yo guhugurwa ku kwihangira imirimo no gukora ubuhinzi bwa kijyambere, Ibrahim yahawe n’umushinga wa Graduation Frw 800.000; ayashora mu guhinga imboga. Bitewe n’uko yashyizeho uburyo bwo kuhira mu murima akodesha Frw 250.000 ku mwaka, ubuhinzi bwe buzajya bukomeza kumwinjiriza amafaranga no mu gihe cy’izuba. Mu gihe cya vuba, arateganya kwinjiza byibuze Frw 3.400.000 mu musaruro we wa mbere  w’amashu na gombo.

Ubuhamya bw’itsinda UBUMWE

Nyuma y’aho umushinga wa ECD uterwa inkunga na Plan International Rwanda ubahaye amahugurwa ku mikorere y’amatsinda yo kubitsa no kugurizanya, ababyeyi 30 b’abana bo mu rugo mbonezamikurire rwa Tuganire bibumbiye mu itsinda ryitwa Ubumwe, batangira korora inkoko kugira ngo babashe kubona indyo yuzuye baha abana babo, ndetse baniteze imbere.

Iri tsinda ryatangiye ryizigama Frw 200 buri cyumweru kuri buri munyamuryango, rifite intego yo kugurira inkoko buri mubyeyi. Hagati aho baje kugira igitekerezo cyo kugura ihene, maze ababyeyi babiri bagurirwa ihene, izindi bazishyira hamwe zikororerwa kuri umwe muri bo ari iz’itsinda.

Abanyamuryango baje kubona ko korora ihene bitunguka cyane, bahita bajya mu bworozi bw’inkoko, ibi bibafungurira imiryango yo kujya bazigurisha nabo baziguze mu itsinda, bakazorora igihe gito mbere yo kuzigurisha. Ubuhamya burambuye bw’iri tsinda murabusanga muri video ikurikira.

 

 

Kuva tariki 24 kugeza kuri 25 Werurwe 2025, muri Centre Saint Vincent Pallotti i Gikondo, hateraniye Inteko Rusange ya Caritas Rwanda ku nshuro ya 28. Iyi nama yari igamije gusuzuma ishyirwa mu bikorwa ry’imyanzuro  y’Inteko Rusange ya 27, kugaragaza raporo y’ibikorwa byakozwe mu 2024, kumurika igenabikorwa ry’umwaka wa 2025, gahunda irambye y’ibikorwa bya Caritas Rwanda 2025-2030, ndetse no gushyiraho imyanzuro y’umwaka wa 2025.

Mu ijambo rifungura iyi nteko ku mugaragaro, Musenyeri Anaclet Mwumvaneza, Umushumba wa Diyosezi ya Nyundo akaba na Perezida wa Caritas Rwanda, yavuze ko ari ngombwa guhuza imbaraga, cyane cyane muri iyi minsi aho inkunga z’amahanga zigenda zigabanuka hakaba n’aho zahagaze. Musenyeri Anaclet yagize ati: “Tugomba rero guhuza imbaraga zacu kurusha ikindi gihe cyose kugira ngo twongere ubushobozi bwacu bwo gutunga abakene, tubereke byinshi mu bikorwa byacu by’urukundo”. Musenyeri Anaclet yongeyeho ko gukora ibikorwa by’ubugiraneza bidaherekejwe n’isengesho   bishobora kurangirira mu gutanga gusa ibishira, nk’uko Papa Fransisiko yabigarutseho mu gihe cyo kwizihiza Umunsi mpuzamahanga w’abakene ku nshuro ya 8 ku ya 17 Ugushyingo 2024.

Perezida wa Caritas Rwanda kandi yashimiye Caritas mu nzego zayo ko yijihije uyu munsi neza (Umunsi w’umukene) basengana bakanasangira n’abakene mu bitaro n’amavuriro ya Kiliziya Gatolika, mu maparuwasi no mu miryango remezo.

Padiri Thomasz Gdula, Umunyamabanga w’ibiro by’Intumwa ya Papa mu Rwanda, yasobanuye ko mu mateka yayo, Caritas yakemuye ibibazo bikomeye ku isi inashyigikira impinduka   zigamije kurandura ubukene. Padiri Thomasz yashimiye imiryango nyarwanda n’imiryango mpuzamahanga, ndetse n’abandi bantu b’umutima mwiza bifatanya na Caritas mu gufasha abatagira kivurira.

Mu Nteko Rusange ya Caritas Rwanda ya 28, raporo y’ibikorwa ya 2024 yatanzwe binyuze mu mashami 4 ya Caritas Rwanda (Ishami ry’Ubuyobozi n’Imari, Ishami ry’Imibereho Myiza  n’Ubutabazi, Ishami ry’Ubuzima n’Ishami ry’Amajyambere).

Ikindi, muri iyi Nteko, hagaragajwe ko umusaruro w’ukwezi k’Urukundo n’Impuhwe wa 2024 ari Frw 165.534.676, Caritas ya Diyosezi ya Ruhengeri ikaba ari yo yaje ku mwanya wa mbere na Frw 35.197.623, ikurikirwa na Caritas ya Diyosezi ya Cyangugu yakusanyije Frw 21.313.555.

Imyanzuro y’umwaka wa 2025

Mu myanzuro y’Inteko Rusange ya Caritas Rwanda yateranye ku nshuro ya 28, harimo gushimangira ubufatanye hagati ya k Komisiyo zitandukanye za C.EP.R., ubufatanye no gushyira hamwe hagati ya Caritas Rwanda na Komisiyo na Serivisi zose z’Abepiskopi na serivisi z’Abepisikopi zikora ibikorwa bijyanye n’iterambere risesuye rya muntu, ndetse no gushimangira ingamba z’ubukangurambaga bugamije kongera umutungo wa Caritas kugira ngo yigire.

Mu myanzuro kandi harimo gukora ikenurabushyo ryo mu magororero mu nzego zose; gushyiraho umuco wo kwigenzura muri za Caritas n’amavuriro yazo (FOSA); gushyiraho uburyo bunyuranye bwo kongera umusaruro w’ukwezi k’Urukundo n’Impuhwe, gushyiraho shapeli muri buri vuriro kugira ngo abarwayi n’imiryango yabo babone aho basengera, ndetse no gushyira imbaraga mu bukangurambaga ku kugira umutima wuje urukundo n’impuhwe  mu bikorwa byayo byose o (ibijyanye no kwita ku batishoboye n’ubutabazi, ibijyanye n’ubuzima n’ibijyanye n’amajyambere).

Inteko Rusange ya Caritas Rwanda ya 28 kandi yabaye umwanya wo guha ikaze Perezida w’ikigo Missio Invest, Padiri Andrew Small, watanze ikiganiro kigufi ku mahirwe atandukanye atangwa n’iki kigo mu gutanga inguzanyo ku bikorwa byo kwiteza imbere mu nzego za Kiliziya Gatolika hagamijwe kwigira.

Mu bukangurambaga bugamije guhamagarira ababyeyi b’abagabo kwita ku burere n’imikurire y’abana babo bwateguwe n’umushinga wa ECD wa Caritas Rwanda uterwa inkunga na Plan International Rwanda ku wa 21 Werurwe 2025 mu Karere ka Bugesera, ababyeyi b’urumuri bo mu Murenge wa Kamabuye batsinze penariti 4 kuri 3 z’ikipe yo mu murenge wa Ngeruka.

Nyuma y’umukino, abayobozi baho batanze imbwirwaruhame ku ruhare rukomeye ababyeyi b’abagabo bagira mu mikurire y’abana babo. Umunyamabanga nshingwabikorwa w’umurenge wa Ngeruka, Bwana Kadafi Aimable, mu ijambo rye yashimiye byimazeyo ababyeyi bitabiriye kujyana abana babo mu marerero, anahamagarira abatarabazana kubazana kugira ngo bunguke ibyiza byinshi byaho. Uyu muyobozi yanashimiye Caritas Rwanda na Plan International Rwanda ku nkunga batera ingo mbonezamikurire mu Karere ka Bugesera.

Bamurange Appollinarie, ushinzwe uburinganire n’iterambere mu Karere ka Bugesera, yatanze ikiganiro gihamagarira ababyeyi bose kwita ku bana babo birinda kubahanana uburakari, ahubwo bakabashyigikira kugira ngo bigirire icyizere, bubaka ubucuti n’abana babo, babatega amatwi, babagaragariza icyo babifuzaho, kubashimira igihe bakoze neza kandi bakabera abana babo icyitegererezo.

Nyuma y’ibiganiro, habajijwe ibibazo bigendanye n’imbonezamikurire y’abana babo, abatsinze bahembwa imipira yo kwambara. Amakipe yombi yahawe ibikombe by’ishimwe, kuko icyari kigenderewe cyari ugutanga ubutumwa kurusha kurushanwa.

a kurushanwa.

Ku bufatanyije n’Ikigo cy’igihugu gishinzwe ubuzima RBC – ishami rishinzwe kurwanya Malariya hamwe n’itsinda ryaturutse ku Karere ka Nyamasheke, kuva ku ya 10 kugeza ku ya 21 Werurwe 2025, Caritas Rwanda yakoze ubugenzuzi mu gihe cy’ibyumweru bibiri bwo kurebwa uko  Malariya ihagaze mu mirenge ishyuha cyane ya Macuba, Kirimbi, na Kagano yo mu Karere ka Nyamasheke.

Iki gikorwa cyari kigamije kumenya uduce twiganjemo Malariya cyane no gushyira mu bikorwa ingamba zigamije kuyirwanya. Mu gihe cy’ibyumweru bibiri, Caritas Rwanda yasuye urugo ku rundi ibice byibasirwa cyane na Malariya, itanga inyigisho z’ingirakamaro mu kuyikumira no kuyirwanya.

Ikindi, binyuze mu nteko z’abaturage, hakozwe ubukangurambaga bugamije gukangurira abayobozi mu nzego z’ibanze n’abaturage muri rusange kugira uruhare mu kurwanya Malariya. Ubu bufatanye bwibanze ku gushyiraho uburyo bunoze bwo kwirinda no kurwanya malariya mu midugudu yibasiwe nayo.

Ku itariki 18 Werurwe 2025, Caritas Rwanda ibinyujije mu mushinga wayo wa ECD uterwa inkunga na Plan Rwanda International yateguye umukino w’umupira w’amaguru wahuje ikipe y’ababyeyi b’urumuri (abagabo) ba Rusenge n’aba Gikunzi mu Karere ka Nyaruguru. Ikipe ya Rusenge yatsinze iya Gikunzi penariti 5 kuri 4. Uyu mukino wateguwe mu rwego rwo gukangurira ababyeyi b’abagabo kwita ku mikurire n’uburere bw’abana babo.

Muri uyu mukino ikipe zombi zanganyije ibitego (kimwe kuri kimwe), habaho gutera penariti. Nyuma y’umukino, Nsabumuremyi Janvier ushinzwe ihuzabikorwa ry’amarerero mu Karere ka Nyaruguru yibukije inkingi 6 z’imbonezamikurire y’abana bato ari zo: (i) Imirire myiza, (ii) Ubuzima, (iii) Isuku n’isukura, (iv) Kurinda no kurengera umwana (v)Gutegurira umwana kujya ku ishuri hakiri kare, (vi) Uburere buboneye.

Bwana Nsanzumuremyi yaboneyeho guhamagarira abagabo guharanira ko izi nkingi zishyirwa mu bikorwa batabihariye ababyeyi b’abagore gusa, ashimira Caritas Rwanda na Plan International Rwanda nk’abaterankunga bagira uruhare mu bikorwa by’iterambere mu Karere ka Nyaruguru, by’umwihariko kwita ku marerero batanga ibikoresho binyuranye, bahugura abarezi no kunganira ababyeyi mu gushakira ibyo kurya abana babo.

Nyuma y’uyu mukino kandi, hanabayeho umwanya wo kubaza ibibazo birebana n’imbonezamikurire y’abana bato, aho abatsinze bahembwe imipira yo kwambara. Ikindi, buri kipe yahawe igikombe cy’ishimwe kuko icyari kigamijwe mbere na mbere ari ugutanga ubutumwa ukurushanwa.

Igikorwa nk’iki cyebereye no mu karere ka Gatsibo ku itariki ya 14 Werurwe 2025, kikaba giteganijwe no kubera mu Karere ka Bugesera kuri 21 Werurwe 2025.

Hagamijwe gukangurira ababyeyi b’abagabo kurushaho kugira uruhare mu burere bw’abana babo, Caritas Rwanda ibinyujije mu mushinga wayo wa ECD uterwa inkunga na Plan International Rwanda, yateguye umukino w’umupira w’amaguru wahuje ababyeyi b’urumuri b’abagabo bo mu murenge wa Murambi n’abo mu murenge wa Kiziguro. Ni igikorwa cyabereye ku kibuga cy’umupira w’amaguru cya Groupe Scolaire Rwimitereri mu murenge wa Murambi mu Karere ka Gatsibo ku ya 14 Werurwe 2025.

Iki gikorwa cyari gifite intego zihariye zikurikira:

– Guteza imbere uruhare rw’ababyeyi, hibandwa cyane cyane ku babyeyi b’abagabo, mu kwita ku bana babo, gufatanya mu kuzuza inshingano mu muryango;

– Gukoresha umupira nk’uburyo bwo guteza imbere imibanire myiza hagati y’ababyeyi n’abana babo;

– Gushyiraho ihuriro ry’ababyeyi b’abagabo bakigira ku babyeyi b’urumuri b’abagabo, kugira ngo bongere ubumenyi mu bijyanye no gutanga uburere buboneye ku bana babo;

– Kwigisha abaturage ibyiza byo gufatanya kw’ababyeyi bombi mu kurera abana, ibi bikaba bishobora kugabanya ibibazo birimo guta ishuri kw’abana, ihohoterwa rikorerwa mu ngo, n’ibibazo by’imyitwarire mibi y’abana mu gihe kizaza.

Muri ubu bukangurambaga bwo guteza imbere uburere buboneye, ikipe y’ababyeyi b’urumuri b’abagabo ya Murambi yatsinze iya Kiziguro ibitego 5 ku busa. Amakipe yombi yahawe ibikombe by’ishimwe kuko icyari kigamijwe cyane cyari ugutanga ubutumwa si ukurushanwa.

Mu gice cya kabiri, abayobozi b’inzego z’ibanze n’abakozi b’umushinga wa ECD batanze ubutumwa bugaragaza uruhare rukomeye ababyeyi b’abagabo bafite mu mbonezamikurire y’abana babo. Nyuma y’ubu butumwa, habaye umwanya w’ibibazo n’ibisubizo, abatsinze bahembwa imipira yo kwambara.

Mu ijambo yagejeje ku bitabiriye iki gikorwa, Mukagasana Naomy, umukozi w’Akarere ka Gatsibo ushinzwe uburinganire n’iterambere ry’umuryango, yasabye ababyeyi (abagabo n’abagore) kwita ku bana babo babaha urukundo, babarera mu buryo bukwiye kandi bagashyiraho imbibi z’ibyo bemerewe gukora n’ibyo batemerewe, babafasha kwigirira icyizere, babarinda ingaruka z’ikoranabuhanga, kandi ababyeyi bombi bagakundana kugira ngo abana babafatireho icyitegererezo.

Ubu bukangurambaga buzakorerwa kandi no muri Nyaruguru ku itariki 18 Werurwe 2025 no mu Bugesera ku ya 21 Werurwe 2025.