Bakristu namwe bavandimwe,
Ku itariki ya 04 Gicurasi 2023, twabagejejeho ubutumwa bubashishikariza kwegeranya inkunga yo gutabara abavandimwe bacu bahuye n’ibiza mu bice bitandukanye by’igihugu cyacu, cyane cyane abo mu Ntara y’amajyaruguru n’iy’uburengerazuba.
Tubashimiye tubikuye ku mutima inkunga yabonetse iturutse mu bwitange no kwitabira iyo mpuruza, mushyira mu bikorwa icyo Ijambo ry’Imana ridusaba aho rigira riti: « nari nshonje muramfungurira, nambaye ubusa muranyambika, ntafite aho mba murancumbikira» (Mt 25,35-36).
Inkunga mwatanze yari itubutse igizwe no gucumbikira no kuba hafi abahuye n’akaga k’ibiza, Kubasura, no kubaganiriza. Mwatanze kandi ibiribwa, amafaranga, imyambaro, ibikoresho by’isuku n’ibyo mu rugo, no gukora imiganda.
Turashimira Abasaseridoti n’abo bafatanya mu Miryangoremezo, muri Paruwasi no mu ngo z’Abihayimana, abakorerabushake n’abakozi ba Caritas mu nzego zose, bashishikarije icyo gikorwa kandi bakagikurikirana kugeza igihe cyo gushyikiriza inkunga abo yari igenewe.
Turabifuriza gukomeza kurangwa n’uwo mutima ugira n’impuhwe kandi utabara. Ineza n’Amahoro bikomoka ku Mwami wacu Yezu Kristu bihorane namwe iteka ryose. Tubasabiye umugisha ku Mana, kandi tubaragije Umubyeyi Bikira Mariya, Umubyeyi utabara abakiristu.
Kureba ubutumwa bwo gushimira inkunga yatanzwe mu kugoboka abahuye n’ibiza byo muri Gicurasi 2023, kanda hano: https://www.youtube.com/watch?v=fQsWnEHI-Lg