Skip to main content
x

Abakene ntibakwiye gusuzugurwa, bakwiriye gufashwa-Antoni Karidinali Kambanda Arikepiskopi wa Kigali

La Caritas « Un pilier de leur survie »

Nyiricyubahiro Antoine Karidinali Kambanda arasaba abantu kudasuzugura abakene bavuga ko ubukene bafite ari bo babwiteye, ahubwo bakihutira kubafasha mu byo bakeneye.

Yabibwiye abari bateraniye i Kibeho ku wa 14 Ugushyingo 2021, nyuma y’igitambo cya Misa Yahaturiye, mu rwego rwo kwizihiza umunsi mpuzamahanga w’abakene.

Nyiricyubahiro Antoni Karidinali Kambanda mu butumwa bwe yaragize ati “Imbere y’Imana twese turi abakene kuko dukeneye impuhwe z’Imana. Uko umukene akugana, akwiyambaza kubera ingorane arimo, abona ko hari ubushobozi ufite cyangwa icyo umusumbije wamufashisha, ujye uzirikana ko nawe ari ko uba umeze imbere y’Imana uyiyambaza.”

Akomeza agira ati “Rero nk’uko wifuza ko Imana yakwakira, ikumva ubusabe bwawe mu bushobozi bwayo ikagufasha, nawe abe ari ko umwakira kandi umufashe. Icyo wifuza ko Imana yagukorera, nawe ugikorere umuvandimwe w’umukene ukugana.”

Yakomeje asobanura ko abakene bafashwa ku buryo butandukanye bitewe n’ubukene bafite ndetse n’uburyo bamerewe. Yatanze urugero rw’ubufasha butangwa na Kiliziya binyuze muri Caritas, avuga ko hari ababa bakennye ariko kandi batanafite imbaraga kubera impamvu z’uburwayi cyangwa gusaza, abo bakaba bitabwaho bagahabwa ibishoboka byose byaboneka ngo bibafashe. Hari n’abafashwa binyuze mu mishanga itandukanye, bagahugurwa mu mirimo itandukanye yabavana mu bukene ndetse bagaterwa n’inkunga mu kuyishyira mu bikorwa.

Aha I Kibeho hari hateraniye  abakene baturutse mu ma diyosezi gatolika yose yo mu Rwanda, aho benshi bashimiye Imana amahirwe bagize yo kugera bwa mbere i Kibeho, ndetse bakahahererwa umugisha na Karidinali Kambanda.

Igitambo cya misa i Kibeho
Igitambo cya misa i Kibeho

André Ntambagiza wo muri Diyosezi ya Kibungo avuga ko ubukene umuntu atabwiha, ariko yisanga nk’uko hari uwisanga mu buzima bwiza nta ruhare yabigizemo. Avuga kandi ko abakene atari imburamumaro, ko hari abashoboye imirimo itandukanye ku buryo iyo batewe inkunga nabo baharanira kwikura mu bukene barimo.

Yagize ati “Ubukene ntawe ubwitera. Ni nko kuvukana n’abandi bana, hakavamo uba perezida. Ntabwo abandi baba babyanze. Abasuzugura abakene nabagira inama yo kwicisha bugufi, bakamenya ko twese imbere y’Imana tungana”

Uyu munsi washyizweho na Nyirubutungane Papa Fransisko, mu gusoza umwaka wa Yubile idasanzwe y’Impuhwe z’Imana (2015-2016).

Mu rwandiko rusoza iyi Yubile, yise “Impuhwe z’Imana n’ubutindahare bwa muntu” (Misericordia et misera), rwo kuwa 20 Ugushyingo 2016, muri numero yarwo ya 21, aho agira ati: “Tumurikiwe na Yubile y’abantu batereranywe mu mibereho ya muntu, mu gihe imiryango ya za kiliziya za katedrali na kiliziya zatoranyijwe ku isi yose ifunzwe, imiryango yiswe “imiryango y’impuhwe z’Imana”, nagize igitekerezo cy’uko ikimenyetso cya nyuma gifatika nk’imbuto y’uyu mwaka udasanzwe wa Yubilie, cyaba gushyiraho ihimbazwa ry’Umunsi Mpuzamahanga w’Abakene, wajya wizihizwa ku cyumweru cya 33 mu Byumweru Bisanzwe by’umwaka wa Liturujiya”.

Mu gushyiraho uwo munsi, Papa Fransisko yifuzaga ko Impuhwe z’Imana zava mu magambo zikajya mu bikorwa.

Kuri iyi nshuro wizihizwaga ku nshuro ya gatanu ku nsanganyamatsiko igira iti: « Abakene muzabahorana iteka » (Mk 14, 7). Mu butumwa bwo kwizihiza uwo munsi, Papa Fransisko yagarutse cyane ku gaciro gakomeye tugomba guha abakene, ashaka kutwereka ko Yezu atubwira ko tuzahorana na We mu bakene kuko, atabana nabo gusa ahubwo yishushanya nabo mu bubabare kandi bakatwigisha byinshi mu buzima.  

Abakene ni isakramentu rya Kristu, baramuhagarariye kandi bakamutuganishaho. Guhorana natwe rero ntibigomba gutuma turambirwa kubitaho, ahubwo biduhamagarira gusangira ubuzima na bo imbonankubone, nta wundi muntu binyuzeho. Mu kurushaho kwerekana agaciro gakomeye bafite ndetse no kudushishikariza kubaha umwanya, yifashisha amagambo  ya Don Primo Mazzolari agira, ati « Ndagusaba ngo ntumbaze niba hari abakene, abo ari bo cyangwa ngo ni bangahe, kuko ntinya ko ibibazo nk’ibi byaba ari ibyo kurangaza cyangwa urwitwazo kugira ngo ubwenge n’umutima byacu bitagira icyo bikora [...] Ntabwo nigeze mbara abakene, kuko badashobora kubarwa. Abakene bagomba kwegerwa, ntibabarwa »

 

Add new comment

Restricted HTML

  • No HTML tags allowed.