Skip to main content
x

Gukorera mu matsinda bifasha Abagenerwabikorwa b’umushinga Caritas Rwanda/UNHCR Graduation Pilot kwagura imishinga yabo

La Caritas « Un pilier de leur survie »

Abagenerwabikorwa b’umushinga Graduation pilot 2020, uterwa inkunga na UNHCR ugashyirwa mu bikorwa na Caritas Rwanda biganjemo impunzi z’Abarundi, Abanyekongo ziri mu mujyi wa kigali n’abaturanyi bazo b’Abanyarwanda batangaza ko gukorera mu matsinda mato yo kubitsa no kugurizanya byabafashije kongera igishoro cy’imishinga batangiye nyuma yo guterwa inkunga n’uyu mushinga, bikaba byarababereye andi mahirwe yo kwiteza imbere.

Madamu Bukebuke Diane, utuye mu murenge wa Kinyinya akarere ka Gasabo avuga ko umushinga Graduation Pilot 2020 wamuteye inkunga y’amafaranga agera ku bihumbi 500 y’amanyarwanda maze agatangira gukora ubucuruzi bw’imboga n’imbuto, aho arangura mu isoko rya Nyabugogo, akabicururiza mu isoko ry'ahitwa kwa Mutangana muri Nyabugogo.

Diane avuga ko mbere y’uko uyu mushinga utangira yakundaga guhura n’ibibazo by’amafaranga yo kwishyura ubukode bw’inzu n’ayo amashuri y’abana; aho uyu ushinga ufasha impunzi umuhereye igishoro, uyu munsi umuryango we ubayeho neza, ngo kuko inyungu bavana mu mushinga w’ubucuruzi akora imufasha kubona ibyo umuryango we ukeneye byose.

Bukebuke Diane avuga ko kuba abagenerwabikorwa bose b’uyu mushinga bafite amatsinda yo kuzigama no kugurizanya bahuriramo bibafasha kongera igishoro cy’imishinga batangiye, bityo ubuzima barimo bukagenda burushaho kuba bwiza.

Madamu Diane yagize ati “Uretse kuba twarahurijwe hamwe tukamenyana, tukaba tunasurana mu ngo zacu, aya matsinda adufasha mu iterambere ryacu. Nk’impunzi, ntabwo twari twemerewe gufata inguzanyo mu bigo by’imari, ariko kubera amatsinda tubarizwamo, tujya mu itsinda tugafatamo amafaranga, ufite ikibazo akagikemura n’ushaka ko umushinga we uzamuka mu rwego rwo hejuru agafatamo amafaranga menshi maze ibyo akora bikiyongera.”Madamu Diane avuga ko amahugurwa abateguye uyu mushinga babanza guha abagenerwabikorwa abungura ubwenge butuma badapfusha ubusa igishoro bahawe, agasaba ko Caritas Rwanda yajya iyategura kenshi, maze bakagira ubumenyi bwisumbuye kandi bagakomeza kwiteza imbere.

Ntakarutimana Esperant King, utuye mu murenge wa Bumbogo, akarere ka Gasabo avuga ko hari itandukaniro rinini mu buzima bw’abagenerwabikorwa b’uyu mushinga mbere y’uko utangira kubafasha n’uyu munsi. Akomoza ku kamaro amatsinda yo kwizigama abagenerwabikorwa bahuriramo nyuma yo kuba buri wese yarahawe igishoro cyo gutangiza umushinga, Ntakarutimana avuga ko aya matsinda yamufashije kuganira n’abo bahuje ikibazo, ufite ikibazo kimuremereye akakiganiriza abo babana mu itsinda kandi ubushobozi bwaba bugiye kumushirana agafata inguzanyo mu itsinda akayikemuza ikibazo atadukiriye igishoro yahawe ngo akirye. avuga ko umushinga w’ubworozi bw’inkwavu yatangiye ugenda ukura, kandi ko umuha icyizere cy’ubuzima.

Bukebuke Diane ubu aracuruza akagira n'umuntu umufasha yishyura
Bukebuke Diane ubu aracuruza akagira n'umuntu umufasha yishyura

Tesire Alexia utuye mu  kagari ka Nyabugogo, Umurenge wa Kigali, akarere ka Nyarugenge ni umugenerwabikorwa w’uyu mushinga ufite ubwenegihugu nyarwanda. Avuga ko yatoranyijwe  n’abakozi b’uyu mushinga kubera ubukene basanze bwugarije umuryango we. Nyuma yo guhugurwa uko umuntu ashobora gukora umushinga muto ukamubyarira inyungu, Alexia yahisemo gukora umushinga w’ubuhinzi bw’ibihumyo; akavuga ko nyuma yo gutangira uyu mushinga ubuzima bwe n’abo babana mu rugo bugenda burushaho kuba bwiza, ngo kuko umushinga we umwinjiriza amafaranga agera ku bihumbi 30 ku kwezi.

Akomoza ku kamaro itsinda ryo kuzigama no kugurizanya ahuriramo n’abandi bagenerwabikorwa b’uyu mushinga rimufitiye, Alexia avuga ko kuba mu itsinda byamufashije gutinyuka, akegera abandi maze akumva ko na we hari icyo yabamarira. Alexia yagize ati “ Itsinda rimfasha kwizigama, nyuma y’umwaka nkayafatira rimwe maze nkakora igikorwa kigaragara. Mu itsinda ndimo hambereye isoko ry’umushinga wanjye w’ibihumyo, kuko bamwe mubo tubana bambereye abakiriya,bakanteza imbere.”akavuga ko intambwe amaze kugeraho na we ashobora gufasha abandi.

Marie Chantal Magnifique, umukozi w’uyu mushinga mu mujyi wa Kigali avuga ko wateguwe mu rwego rwo guteza imbere imibereho y’impunzi ziri mu Rwanda na bamwe mu baturanyi bazo babarizwa mu kiciro cya mbere n’icya kabiri by’ubudehe b’Abanyarwanda; ukabafasha kunguka ubumenyi bwabateza imbere by’umwihariko mu guhanga imirimo ibazamura mu rwego rw’ubukungu, bakiteza imbere batarindiriye gutegereza inkunga z’abagiraneza.

Magnifique Marie Chantal yagize ati “ Tujya kubahitamo twahereye ku bantu bababaye kurusha abandi, urugero hano mu mujyi wa Kigali, hari abo twasanze batakibona amafaranga yo kwishyura inzu babamo; ugasanga bahora birukanwa mu mazu kubera kubura ubukode. Nyuma yo guhugurwa no guhabwa igishoro, batangiye imishinga bihitiyemo, ubu bari mu masoko baracuruza, abandi bakora ubuhinzi, ubworozi, ubukorikori hari n’abatwara moto. Uyu munsi babasha kwikemurira ibibazo bahura nabyo, bijyanye n’imibereho.”

Chantal avuga ko kuba bafite amatsinda bahuriyemo byababereye andi mahirwe abafasha gukemura ibibazo bimwe na bimwe bijyanye n’amafaranga, ngo kuko bizigama kandi ukeneye amafaranga akaba yagana itsinda rikamuguriza, inyungu ivuye mu nguzanyo buri wese akayigiraho uruhare.

Umushinga Caritas Rwanda/UNHCR Graduation Pilot 2020ukorera mu mujyi wa Kigali, ukanakorera mu nkambi ya Kiziba n’iya Nyabiheke.Mu mujyi wa Kigali, ufasha abagenerwabikorwa 399.

 

Add new comment

Restricted HTML

  • No HTML tags allowed.