Skip to main content
x

Guhabwa ibikoresho by’ishuri na Caritas Rwanda ibinyujije mu mushinga USAID/GIMBUKA byagabanyije imvune z’ababyeyi

happy to go back to school

Ababyeyi bafite abana bafashwa na Caritas Rwanda ibinyujije mu mushinga USAID Gimbuka bahamya ko ubufasha bw’ibikoresho by’ishuri abana babo bahabwa atari abana bigirira umumaro gusa ahubwo ari inyungu ku muryango wose.

USAID Gimbuka, ni umushinga uri mu cyiciro cyawo cya gatatu (2020-2022), ukorera mu mu ntara y’uburengerazuba mu turere twa RUBAVU, RUTSIRO, KARONGI, NYAMASHEKE na RUSIZI, hibandwa cyane ku bana b’imfubyi n’abakomoka mu miryango ikennye bafite ubwandu bw’agakoko gatera Sida cyangwa bagerwaho n’ingaruka z’iyi ndwara ndetse n’abahuye n’ikibazo cy’ihohoterwa rishingiye ku gitsina.

Abanyeshuri bahawe ibikoresho bizabafasha ku ishuri
Abanyeshuri bahawe ibikoresho bizabafasha ku ishuri

Bangamwabo Jean Bosco utuye mu karere ka Rubavu umurenge wa Rubavu, afite abana 8 bose biga, muri bo batatu baterwa inkunga n’umushinga USAID/Gimbuka. Uyu mubyeyi avuga ko bamaze guhabwa ibikoresho by’ishuri ku nshuro ya mbere mu mwaka wa 2020, yahise abona impinduka kuko ubusanzwe yasaranganyaga ibikoresho bike yabonaga abana bose, ariko ubu akaba ashaka ibya 5 gusa, ubundi ashyira imbaraga mu gushaka ibibatunga.

Yagize ati “Mbere nahangayikishwaga n’ibikoresho by’ishuri, ibyo kurya n’ibindi bikenerwa mu rugo nkumva ntaye umutwe ndetse bimwe bikabura, ariko aho ikibazo cy’ibikoresho kiviriyeho ku bana batatu, ubu ndwana n’ibisigaye ukabona ko norohewe ngereranyije na mbere, Abana ntibakinsonzana nka mbere”

Nyiramana Consolée utuye mu murenge wa Shangi mu karere ka Nyamasheke, avuga ko iyo umwana we atabona ubufasha bw’umushinga USAID Gimbuka, uyu munsi yari kuba yicaye atiga kuko nta bushobozi na buke yari afite bwo kumubonera ibikoresho.

Uyu mubyeyi avuga ko umwana we ubu yiga mu mwaka wa mbere afite imyaka 11, kuko atabashije kumushyira mu ishuri mbere ngo atangirire ku myaka 7 nk’abandi kubera ikibazo cy’amikoro. Uyu munsi avuga ko yishimye cyane kuko byibura azajya amushakira ibimutunga adahangayitswe no kongeraho ibikoresho by’ishuri.

Gasana Athanase wo mu karere ka Rutsiro umurenge wa Boneza, ufite abana batatu bafashwa n’umushinga USAID Gimbuka, avuga ko bafite ibyishimo byinshi baterwa no kuba aba bana barahawe ibikoresho by’ishuri, kuko ubusanzwe kubibona byabaga bikomeye cyane.

Mbere yo guhabwa ibikoresho bahabwa ubutumwa bubakangurira gufata neza ibyo bahawe
Mbere yo guhabwa ibikoresho bahabwa ubutumwa bubakangurira kubifata neza

Gasana ati “Hari ubwo noherezaga umwana umwe ku ishuri igihe cyo gutangira, abandi bagakererwa nk’icyumweru nkiri kubashakira ibikoresho, ubwo kandi niko no kubona amafunguro byabaga ikibazo kinini cyane cyane mu gihe cy’itangira ry’amashuri. Ubu ariko biranyorohereza, iyo babonye ibikoresho batangirira igihe nanjye ngasigara nshaka ibibatunga”.

Muragijimana Anitha ni umukobwa w’imyaka 17 wiga mu mashuri yisumbuye, icyo yifuza ni ukuzaba umuganga cyangwa umwalimu nyuma yo kurangiza amasomo. Ibi byose ariko ngo ntiyari kuba anabitekereza iyo atabona amahirwe yo gufashwa n’umushinga USAID/Gimbuka umuha ibikoresho by’ishuri.

Ati “Mama wanjye nta bushobozi buhagije afite, ntiyabashaga kumbonera ibikoresho by’ishuri ngo anatubonere ibidutunga jye na barumuna banjye babiri, iyo rero ataba Caritas ibinyujije mu mushinga USAID Gimbuka, ubu sinari kuba niga cyangwa mfite indoto z’icyo nifuza kuzakora nk’uko bimeze ubu”

Mu itangira ry’amashuri ry’uyu mwaka wa 2021-2022, abanyeshuri bahawe ibikoresho n’umushinga Caritas Rwanda/USAID GIMBUKA ni 32,521, bo mu turere dutanu two mu ntara y’uburengerazuba uyu mushinga ukoreramo.

Add new comment

Restricted HTML

  • No HTML tags allowed.