Skip to main content
x

Binyuze mu mushinga UNHCR/Graduation Pilot, ubuhinzi bw’ibihumyo bwahinduye imibereho ya Tesire Alexia

La Caritas Un pilier de leur survie

Nyuma yo guhabwa inkunga na caritas Rwanda, binyujijwe mu mushinga UNHCR Graduation Pilot 2020 akayikoresha umushinga wo gukora ubuhinzi bw’ibihumyo; Tesire Alexia avuga ko uyu mushinga wahinduye byinshi mu mibereho ye n’abagize umuryango we.

Tesire Alexia utuye mu kagari ka Nyabugogo, Umurenge wa Kigali, akarere ka Nyarugenge ni umugenerwabikorwa w’uyu mushinga atangaza ko uyu mushinga wamufashije guhindura imibereho binyuze mu mushinga w’ubuhinzi bw’ibihumyo yatewemo inkunga.

Tesire Avuga ko yatoranyijwe  n’abakozi b’uyu mushinga kubera ubukene basanze bwugarije umuryango we. Nyuma yo guhugurwa uko umuntu ashobora gukora umushinga muto ukamubyarira inyungu, Tesire yahisemo gukora umushinga w’ubuhinzi bw’ibihumyo; akavuga ko nyuma yo gutangira uyu mushinga ubuzima bwe n’abo babana mu rugo bugenda burushaho kuba bwiza, ngo kuko umushinga we umwinjiriza amafaranga agera ku bihumbi 30 ku kwezi.

Tesire yagize ati “ Nkimara guhabwa amahugurwa na graduation pilot, nahisemo gukora umushinga w’ubuhinzi bw’ibihumyo. Uyu mushinga narawukoze uramfasha, mbasha guteza imbere umuryango wanjye tubona ikidutunga, abo bana bashoboye kujya mu ishuri ndetse n’umukecuru ushaje nshinzwe kwitaho mubonera ikimutunga.”Tesire avuga ko uyu munsi atakibarirwa ku rutonde rw’abakene kuburyo bukabije.

Agaruka ku mpinduka we yibonaho nyuma yo gutangira umushinga w’ubuhinzi bw’ibihumyo, Tesire yagize ati “ Ubu ninjiye mu itsinda ryo kuzigama no kugurizanya, aho nemerewe gufata inguzanyo nkongera ibikorwa by’umushinga wanjye, nkagura ibikorwa maze n’inyungu ikiyongera.”

Akomoza ku kamaro itsinda ryo kuzigama no kugurizanya ahuriramo n’abandi bagenerwabikorwa b’uyu mushinga rimufitiye, Alexia avuga ko kuribamo byamufashije gutinyuka, akegera abandi maze akumva ko na we hari icyo yabamarira.

Yagize ati “ Itsinda rimfasha kwizigama, nyuma y’umwaka nkayafatira rimwe maze nkakora igikorwa kigaragara. Mu itsinda ndimo hambereye isoko ry’umushinga wanjye w’ibihumyo, kuko bamwe mubo tubana bambereye abakiriya,bakanteza imbere.”akavuga ko intambwe amaze kugeraho na we ashobora gufasha abandi.

Madamu Marie Chantal Magnifique, umukozi w’uyu mushinga mu mujyi wa Kigali avuga ko wateguwe mu rwego rwo guteza imbere imibereho y’impunzi ziri mu Rwanda na bamwe mu baturanyi bazo babarizwa mu kiciro cya mbere cy’ubudehe b’Abanyarwanda; ukabafasha kunguka ubumenyi bwabateza imbere by’umwihariko mu guhanga imirimo ibazamura mu rwego rw’ubukungu, bakiteza imbere batarindiriye gutegereza inkunga z’abagiraneza.

Umushinga Caritas Rwanda/UNHCR Graduation Pilot ukorera mu mujyi wa Kigali, ukanakorera mu nkambi ya Kiziba n’iya Nyabiheke.Mu mujyi wa Kigali, ufasha abagenerwabikorwa 399.

 

Add new comment

Restricted HTML

  • No HTML tags allowed.