Skip to main content
x

Umushinga "GIMBUKA" wasoje ibikorwa byayo mu turere 7

Ruhangp phase out

Gimbuka ni umushinga watewe inkunga na USAID ushyirwa mu bikorwa na Caritas Rwanda, intego nyamukuru zawo mu turere 11 hagati ya 2012-2020 zari ukuzamura imirire, gushimangira imibereho myiza y'imfubyi n'abandi bana bakomoka mu miryango itishoboye ndetse n'imiryango yabo ndetse no kongerera ubumenyi abana b’abakobwa n'abagore bakiri bato mu kubafasha gukumira ubwandu bushya bwa virusi itera SIDA hamwe n’ihohoterwa rishingiye ku gitsina.

Caritas Rwanda /USAID Gimbuka yashyizwe mu bikorwa mu turere twa Gatsibo, Rwamagana, Gicumbi, Kamonyi, Muhanga, Ruhango, Nyamagabe, Nyuguru, Karongi, Ngororero na Rutsiro. Kuri ubu yasoje ibikorwa byayo mu turere 7, ikomeza ibikorwa mu turere twa Gicumbi, Kamonyi, Karongi na Rutsiro haniyongeraho uturere 3 dushya two mu ntara y'uburengerazuba (Rusizi, Rubavu na Nyamasheke).

Mu gushyira mu bikorwa umushinga Gimbuka, Caritas Rwanda yafatanyije naGuverinoma yu Rwanda binyuze muri minisiteri y’Ubuzima (MoH), Minisiteri y'Uburinganire n'Iterambere ry'Umuryango (MIGEPROF), Minisiteri y'Ubutegetsi bw'Igihugu (MINALOC) N’ibigo bizishamikiyeho nka RBC, NCC na NECDP hamwe n’abandi bafatanyabikorwa mu iterambere Mu gushyira mu bikorwa ingamba zose ziteza imbere imirire myiza, kongerera ubushobozi abagore no gutera inkunga Imfubyi n’abana bakomoka mu miryango itishoboye.

Bahuguwe ku biranga imirire myiza none ntibakirwaza bwaki
Bahuguwe ku biranga imirire myiza none ntibakirwaza bwaki

Muri gahunda Mbonezamikurire y’abana bato, hibanzwe ku miryango ifite abana bari munsi y’imyaka itanu n’abagore batwite. Ibyo Byose umushinga gimbuka wabikoraga binyuze mu mashuri mbonezamirire, imirimashuri ndetse n’amatsinda y’ibimina bivuguruye avuguruye yo kubatoza kwizigamira no kugurizanya. Hashyizweho kandi gahunda yo guhugura abakobwa ku kwirinda no kurwanya virusi itera SIDA n’ihohoterwa rishingiye ku gitsina.

Caritas Rwanda yubatse ubufatanye n’inzego z’ibanze n’abafatanyabikorwa ba kiliziya gatolika binyuze mu gusura ibikorwa, gutegura no gukora inama zigamije gusangira ibitekerezo ku bikorwa by’umushinga, ku mbogamizi ndetse no gushakira ibisubizo hamwe.

Ubuyobozi bw’uturere uyu mushinga wasojemo ibikorwa burashima cyane ibyagezweho ndetse bukanizeza abagenerwabikorwa ko buzakomeza kubaba hafi, hakabungabungwa ibikorwa bafite ndetse bigakomeza no gutera imbere.

Umuyobozi w’akarere ka Rwamagana MBONYUMUVUNYI Radjab, mu muhango wo gusoza ibikorwa by’uyu mushinga muri Rwamagana, yagarutse ku byakozwe bitandukanye, ashima uruhare Gimbuka yagize mu kubaka icyizere mu rubyiruko, cyane ako abenshi babaga ari abana bafite ibibazo by’ubukene bibaremereye.

Yagize ati “Hari umwe mu rubyiruko rwafashijwe na Caritas binyuze muri Gimbuka, watubwiye ko yari ageze aho yumva yanze ubuzima ku buryo yaniyahura, ariko ubu ameze neza, yize umwuga ubu abasha kwiha icyo akeneye. Ibi rero ni ibyo gushima kuko gufasha abantu kubaka ubuzima ni iki bivuga”

Umuyobozi w'akarere ka Rwamagana Mbonyumuvunyi Radjab ashimira Caritas Rwanda
Umuyobozi w'akarere ka Rwamagana Mbonyumuvunyi Radjab ashimira Caritas Rwanda

Ubuyobozi bw’akarere ka Ruhango nabwo bubinyujije ku rubuga rw’akarere rwa Twitter, bwashimiye imikoranire myiza na Caritas Rwanda/USAID Gimbuka mu myaka 8 uyu mushinga wari uhamaze.

Uretse kandi ubuyobozi bw’uturere umushinga wakoreyemo, n’abagenerwabikorwa ubwabo bavuga ko umushinga usize uhinduye imibereho yabo ku buryo bugaragara.

Mukeshimana Valentine umwe mu bajyanama b’ubuzima mu murenge wa Muhororo akarere ka Ngororero, avuga ko mu myaka 2 ishize bagize abana barenga 70 barwaye indwara ziterwa n’imirire mibi muri uyu murenge, ariko bakurikije ubumenyi bahawe n’umushinga Gimbuka ubu abana bose bakaba barakize bameze neza.

Ibyagezweho rero ni byinshi kandi bigomba kubungabungwa kugirango bikomeze kugirira akamaro abaturage.

Bimwe muri ibyo bikorwa byagezweho mu turere 7, ni imirimashuri 273 (FFS) n’amatsinda 1370 yo kuzigama no kuguriza (ISLGs), abanyeshuri 12926 bahawe ibikoresho by’ishuri muri gahunda ya (OVC), abagore batwite 70101 n'abagore bonsa 105510 bahuguwe ku bijyanye n’imirire myiza (ECD) ndetse na gahunga z’isuku n’isukura (WASH).

Abakozi b’ibigo nderabuzima bahuguwe hamwe n’abakozi bashinzwe ubuzima bw’abaturage bazakomeza gukoresha ubumenyi bungutse mu guhangana n’ibibazo by’imirire mibi.

Abayobozi b'akarere n'abandi bafatanyabikorwa mu baturage barasabwa gukomeza gukorana n’abakorerabushake bahuguwe mu bice bitandukanye, ariko kandi n'inzego za Caritas zegerejwe abaturage zizakomeza gukorana bya hafi n'inzego z'ibanze kugira ngo zikomeze zishyigikire ibikorwa byagezweho

Ubyiruko rwafashijwe kwiga imyuga rwihangira imirimo
Urubyiruko rwafashijwe kwiga imyuga rwihangira imirimo

urubyiruko

Add new comment

Restricted HTML

  • No HTML tags allowed.