Skip to main content
x

Umunsi mpuzamahanga w’Abimukira n’Impunzi 

La Caritas Un pilier de leur survie

 Ku cyumweru, tariki ya 27 Nzeri 2020 ni umunsi mpuzamahanga w’abimukira n’impunzi ku nshuro ya 106, ufite insanganyamatsiko igira iti "Guhatirwa guhunga nka Yezu Kristu", yatoranijwe na Nyirubutungane Papa Fransisko, ashingiye ku byabaye kuri Yezu Kristu wimuwe akanahunga hamwe n’ababyeyi be.

Muri uyu mwaka wa 2020, Kiliziya Gatolika ku rwego rw’isi yateganyije kwizihiza uyu munsi ahanini yibanda ku bahunga hagati mu gihugu cyabo (Abimukira), bitewe n’ibiza, intambara, amakimbirane, inzara n’ibindi bituma abantu bavanwa mu byabo, ndetse hanazirikanwa abahura n’ingaruka z’icyorezo cya COVID 19 muri iki gihe.

Papa Fransisko yagize ati "Muri buri wese muri bo, Yezu arahari, kimwe no mu gihe cya Herode bahatirwa guhunga bashakisha umutekano. Duhamagariwe rero kubona ishusho ya Kristu muri bo ». Akomeza avuga ko ibi ari ukuri, cyane cyane muri iki gihe cy'ibibazo by’isi yose byatewe n’icyorezo cya COVID-19.

Mu Rwanda n’ubwo hatagaragara abahunga hagati mu gihugu muri iki gihe, ariko hari Impunzi z’abanyamahanga hafi ibihumi 100 zitujwe mu nkambi zitandukanye mu gihugu, ndetse hakaba n’abahuye n’ingaruka z’icyorezo cya COVID 19 nko gutakaza akazi kabafashaga kwitunga.

Nk’uko Caritas bivuga ‘ Urukundo’, mu nshingano zayo harimo kugaragariza urukundo aba bose bababaye, binyuzw mu kubafasha kugarura icyizere n’agaciro baremanywe mu ishusho ya Kristu duhamagarirwa kubabonamo.

Mu bufasha Caritas Rwanda itanga mu mpunzi ziri mu nkambi 3 (Kiziba, Nyabiheke Mahama) n’iziri mu mujyi wa Kigali, harimo kwita ku bafite imbaraga nke nk’abageze mu zabukuru n’abarwayi, Gutanga amahugurwa n’ubujyanama mu bijyanye no kwihangira umurimo, abafashwa kuzamura imibereho yabo binyuze mu matsinda yo kuzigama no kugurizanya ndetse n’abakiri bato bakeneye ubufasha bwihariye nk’abana b’abakobwa babyariye iwabo.

Abasaza n'abakecuru bitabwaho na Caritas Rwanda mu nkambi ya Mahama
Abasaza n'abakecuru bitabwaho na Caritas Rwanda mu nkambi ya Mahama

UWITONZE Benjamin umwe mu bakorerabushake ba Caritas Rwanda mu nkambi ya Nyabiheke iherereye mu karere ka Gatsibo avuga ko nk’umwe mu rubyiruko rwakuriye muri iyi nkambi akaba ayimazemo imyaka 14, avuga ko nta kibi nk’ubuhunzi. Avuga ko atibuka neza aho yavukiye ndetse atanazi ubuzima busanzwe butari ukwitwa impunzi.

Akomeza avuga ko binyuze mu mushinga UNHCR/Graduation Pilot 2020 ushyirwa mu bikorwa na Caritas Rwanda, ashimishwa no gufatanya n’uyu Muryango kugarurira icyizere bagenzi be babana mu nkambi.

Yagize ati « Ibyo tubura ni byinshi muri ubu buzima bw’ubuhunzi, ariko kimwe mu bifasha abantu nkanjye ni ukwibutswa ko dukunzwe kandi dufite agaciro, Caritas rero ni umwe mu miryango ituma twongera kugira icyizere, ari nabyo mparanira kugeza ku bo tubana mu nkambi »

Abasaza n'abakecuru bari mu nkambi ya Mahama bahabwa ubufasha bujyanye n’ibiribwa bemeza ko kwitabwaho na Caritas Rwanda biri mu byagiye bibafasha kutiheba mu buzima bw’ubuhunzi.

Add new comment

Restricted HTML

  • No HTML tags allowed.