Skip to main content
x

Ibyiza umushinga “Graduation Pilot 2020” ugejeje ku bagenerwabikorwa bawo

La Caritas « Un pilier de leur survie »

Graduation Pilot 2020 ni umushinga ugamije gufasha impunzi kwivana mu bukene no kuzifasha kugira imibereho myiza, uterwa inkunga n’ishami ry’umuryango w’abibumbye ryita ku mpunzi UNHCR, ugashyirwa mu bikorwa na Caritas Rwanda.

Ubuzima bwabo bwatangiye kuba bwiza kurushaho bivuye ku mushinga “Graduation Pilot 2020”

Abagenerwabikorwa b’uyu mushinga baravuga ko wabafashije kunguka ubumenyi bubafasha gukoresha neza ibyo bafite, guhanga imirimo ibabyarira inyungu no kugira uruhare mu kwiteza imbere.

Madamu Mezukwigira Florida ni umubyeyi w’abana batatu, akaba n’ umugenerwabikorwa w’uyu mushinga, akorera ubucuruzi mu murenge wa Gikondo, akarere ka Kicukiro. Avuga ko ubumenyi yahawe n’abakozi ba Caritas Rwanda bwamuhaye ubumenyi bwo kwikorera no gukoresha neza inkunga yahawe maze akunguka byinshi.

Florida yagize ati “Mbere nashoboraga kuba mfise amafaranga nkayakoresha nabi, hagira imfashanyo mpabwa nkayikoresha nabi bityo nkagomeza kubaho nabi; ariko ndashimira abakozi ba Caritas ko mbere yo kudutera inkunga babanje bagafata umwanya uhagije bakatwigisha. ”

Florida avuga ko mu masomo bahawe banagaragarijwe imbogamizi zituma  bamwe mu batangira imishinga bagera hagati ikabapfana bitewe n’uko bakoze ibitari mu murongo w’ibyateganyijwe mu mushinga, bityo akavuga ko  inyigisho yahawe zamuteguye mu mutwe  ku buryo atazahura n’igihombo mu mushinga we yatangiye w’ubucuruzi.

Ikindi Florida yemeza ni uko nyuma yo gutangira umushinga we ubu arimo kugenda abona impinduka mu buzima bwe

Ati “ Mbere wasangaga abana banjye ntashobora kubabonera ibyo bansaba, ariko aho mperewe igishoro na Caritas nkatangira gucuruza ubu mu rugo nta bibazo by’ubukene bikitwugariza cyane nka mbere, simbura byibura amafaranga 5000 y’inyungu mbona ku minsi.”

Avuga ko agendeye ku bumenyi yahawe n’ubushobozi amaze kugeraho abona ko mu gihe kizaza azaba yifashije ku buryo n’ubwo imfashanyo zigenewe impunzi zabura kuri we ubuzima bushobora gukomeza.

Maniragaba Pierre utuye mu karere ka Gatsibo umurenge wa Mugera, nawe yahuguwe anaterwa inkunga n’umushinga Graduation Pilot 2020, maze abasha kwihingira mu gihe yari asanzwe ahingira abanda kugirango abone ibimutunga.

Pierre Maniragaba agurisha inyanya ahinga mu murima we
Pierre Maniragaba agurisha inyanya ahinga mu murima we

Nyuma yo gushyikirizwa inkunga y’amafaranga agenewe ku mufasha mu mushinga we, yatangiye ubuhinzi bw’inyanya none ubu ari gusarura aho ashora ku isoko ibiro hafi 20 buri cyumweru, akaba anamaze no kwizigamira amafaranga 284500 kuri Sacco

Nsabiyaremye Jean d’Amour umukozi w’uyu mushinga by’umwihariko mu mujyi wa Kigali, avuga ko uyu mushinga wazanye impinduka nziza ku mibereho y’abagenerwabikorwa bawo;  ni ukuvuga impunzi ndetse n’abanyarwanda bazicumbikiye.

Yagize ati “Impunzi zabashije kumva ko zishobora kugira icyo zikora mu guhindura imibereho yazo zitarambirije ku nkunga zihabwa. Nyuma yo kubagezaho uyu mushinga imyumvire kuribo yarahindutse, uyu munsi aho kugira ngo abyuke yicaye mu nkambi ategereje ko ukwezi gushira ngo UNHCR cyangwa WFP ibahe ifunguro, barabyuka bakajya ku murimo.”

Umushinga “Graduation Pilot 2020” wa Caritas Rwanda watangiye muri Mutarama 2020, ufasha impunzi na bamwe mu baturanyi bazo gukora ibikorwa bibafasha kwiteza imbere no kugira imibereho myiza binyuze mu gutera inkunga imishinga bateguye; muri iyo harimo ubucuruzi, ubworozi, ubuhinzi, gutunganya imisatsi n’indi mirimo ibyara inyungu.

Uyu mushinga ufite abagenerwabikorwa bagera kuri 840, barimo impunzi 670 n’abaturanyi bazo b’abanyarwanda 170. Ukorera muri zone 3 arizo inkambi ya Nyabiheke iherereye mu karere ka Gatsibo, inkambi ya Kiziba iri mu karere ka Karongi ndetse na zone ya gatatu ibarizwamo impunzi ziri mu mujyi wa Kigali.

Nyuma y’inyigisho n’amahugurwa bihabwa abagenerwabikorwa, uyu mushinga ugenera buri mushinga wateguwe n’umugenerwabikorwa igishoro kingana n’amadorali 500 ya Amerika (500 USD), kandi ugakomeza kumuba hafi no kumugira inama mu ishyirwa mu bikorwa ry’umushinga we.

Add new comment

Restricted HTML

  • No HTML tags allowed.