Aller au contenu principal
x

Inguzanyo ziciriritse z’ubucuruzi zazamuye imibereho y’abari mu matsinda yo kubitsa no kugurizanya

Inguzanyo ziciriritse z’ubucuruzi zazamuye imibereho y’abari mu matsinda yo kubitsa no kugurizanya

Abagenerwabikorwa ba Caritas Rwanda bibumbiye mu matsinda yo kubitsa no kugurizanya binyuze mu mushinga USAID GIMBUKA, bahamya ko bimaze kubateza intambwe mu iterambere.

Mukandamira Anonsiyata abarizwa mw’itsinda Tubumwe –Mubuga ryo mu Mudugudu wa Ryaruhanga, Umurenge wa Mubuga, Akarere ka Karongi. Kuva iri itsinda ryatangira muri Gashyantare 2016, abarigize bamaze kwizigamira bishimishije ndetse banahanahana inguzanyo binyuze mu bwizigame bwabo. 


Itsinda ryabo ryatangiranye abanyamuryango bagera kuri makumyabiri na batanu, ariko nyuma bamwe bagiye bacika integer mu ntangiriro kubera kutabasha kwishyura inguzanyo zabo, ariko nyuma bakiriye abandi banyamuryango bashya.

Anonsiyata aragira ati “Ubu turi makumyabiri n’umunani, tugerageza gufatikanya ibyo bigatuma duterana imbaraga kandi twizeye ko iterambere ryacu rizakomeza kwiyongera bigendeye ko tuzakomeza kwesa imihigo twihaye nk’itsinda kubera ubushobozi twabashije kubaka” 

Yakomeje agira ati: “Turashimira Cyane Caritas Rwanda ibinyujije mu mushinga USAID Gimbuka yatumye twigirira icyizere tukabona ko tutari abakene nkuko twabikekaga, ahubwo ko dukeneye guhugurwa no kwerekwa amahirwe ahari. Mbere ntitwagiraga amahirwe yo kwizigama no guteganya ejo hazaza, ariko ubu USAID Gimbuka yarabidutoje”

Anonsiyata ubu afite icyangombwa kimwemerera kubumba no gucuruza amatafari ahiye mu Murenge wa Mubuga yahawe n’Akarere ka Karongi. Ibyo byose yabigezeho bivuye ku nguzanyo ntoya yahawe mu itsinda ayikoresha gutangiza agashinga gato ko gucuruza imineke ndetse n’inzoga mu bitoki.

Mukandamira aho abumbishiriza amatafari
Mukandamira aho abumbishiriza amatafari

“Mu Ntangiriro y’umushinga wanjye nasabye inguzanyo ntoya mu itsinda Tubumwe-Mubuga iri hagati y’amafranga 50,000 na 150,000 kugirango mbashe gutangira ubushabitsi bwanjye. Byose nabifashijwemo n’ubushobozi nubakiwe binyuze mu matsinda yo kubitsa no kugurizanya”

Nyuma Anonsiyata yaje kubona ko inguzanyo z’itsinda zidahagije kugirango ubushabitsi bwe burusheho gutera imbere. Kuko yari yaratangiye kubumba no gucuruza amatafari ahiye, ibyo bikaba byaramusabaga igishoro gihagije, yigira inama yo kwegera Mubuga SACCO abereye umunyamuryango, maze mu mwaka wa 2017 abona inguzanyo ingana na 350,000 frw yo kwagura ibikorwa bye.

Yakomeje gukorana na SACCO afata inguzanyo akanishyura neza kugeza na n’uyu munsi niko bimeze. Vuba aha yasabye inguzanyo ya 1,000,000 frw muri SACCO Mubuga kandi kugeza ugu arishyura neza nta kibazo.

Mu binezaneza byinshi, Anonsiyata ati: “Umushinga wanjye kugeza ubu uragenda neza, nshimishwa nuko mpa abagera kuri 16 akazi buri munsi, aho buri wese muhemba agera ku 1500, nkaba buri kwezi mpemba agera ku bihumbi Magana atanu ku bakozi banjye biganjemo abagore n’urubyiruko. Ibyo rero biranshimisha cyane kuko nanjye mfite uruhare mu guhanga imirimo no gutanga amahirwe y’akazi”  

Kuri ubu Anonsiyata umushingawe wo kubumba no gucuruza amatafari ahiye ugeze ku gishoro gikabakaba miliyoni ebyiri n’igice y’amanyarwanda. Ibi byahinduye ubuzima bwe cyane nkuko we abyivugira: “ ntureba ukuntu nsigaye nsa!!!” (Aseka)

Ajouter un commentaire

HTML restreint

  • Aucune balise HTML autorisée.