Aller au contenu principal
x

Abagabo ntibakwiye guharira abagore inshingano zo kwita ku mirire myiza

Abagabo ntibakwiye guharira abagore inshingano zo kwita ku mirire myiza

Caritas Rwanda ibinyujije mu mishinga yayo Gimbuka na Gikuriro iterwa inkunga na USAID ndetse ifatanyije n’abafatanyabikorwa baterwa inkunga na USAID hamwe n’akarereka Ruhango, barahamagarira abagabo batuye aka karere kugira uruhare mu mirire myiza mu ngo zabo.

Iyi miryango iherutse gukora ubukangurambaga mu kagari ka Mwendo mu murenge wa Mbuye, ivuga ko gukangurira abagabo kugira uruhare mu guteza imbere imirire, isuku n’isukura   mu miryango yabo bishingiye kukuba muri aka kagari hagaragara ikibazo cy’imirire mibi.

Aha ngo bikaba biterwa n’uko abagabo bamwe na bamwe batererana abagore babo mu kwita ku bana mugihe bakeneye gushakirwa indyo yuzuye nkuko Kanyamibwa Callixte umukozi wa Caritas Rwanda abigarukaho.

Ati “turashishikariza abagabo kugira uruhare mu mirire y’umwana ndetse no kwita ku buzima bw’umwana n’umubyeyi muri rusange, umubyeyi mu gihe atwite, umugabo agomba kumwitaho akamufasha imirimo amurinda imvune kandi akamumenyera ifunguro ryuzuye”

Kanyamibwa asobanura ko iyo umugore ahariwe izi nshingano zose aribwo usanga avunika ndetse ntiyite ku mwana mu buryo bukwiye kuko ubundi ari inshingano zabo bombi, kandi kutabyitaho bikaba aribyo bigira ingaruka ku bana aho usanga bahura n’indwara zituruka ku mirire mibi.

Minani Augustin umwe mu bagabo bigeze kurwaza imirire mibi muri aka karere ka Ruhango mu murenge wa Mwendo, avuga ko nyuma yo guhugurwa n’abakozi ba Caritas, akumva uruhare rwe nk’umugabo mu rugo, yagabanyije kujya mu kabari, amafaranga yanyweraga akajya ayahahisha bityo imirire mibi icika mu rugo rwe.

Ati: “Mbere nakoraga ikiraka maze ayo nkuyemo nkayajyana mu kabari gusa iby’urugo simbyiteho,umwana agira imirire mibi ikabije (ajya mu mutuku) kubera kubura indyo yuzuye, ariko aho nahuguriwe n’abakozi ba Caritas Rwanda ndetse nkanitabira igikoni cy’umudugudu, nagabanyije inzoga maze nita ku rugo umwana arakira nanubu ameze neza.”

Abagabo ntibakwiye guharira abagore inshingano zo kwita ku mirire myiza
Nyuma yo guhugurwa na Caritas ku mirire, umwana we yarakize

Umuyobozi w’akarere ka Ruhango wungirije ushinzwe iterambere ry’imibereho myiza y’abaturage Alphonsine Mukangenzi yemeza ko mu tugari 59 tugize akarere ka Ruhango aka kagali ka Mwendo kari mu murenge wa Mbuye kaza ku isonga mukugira abana benshi bagifite ikibazo cy’imirire mibi.

Uyu muyobozi ushimangira akamaro kanini k’ubu bukangurambaga, avuga ko kugabanya no guca burundu imirire mibi igaragara muri imwe mu miryango y’aka karere, bitagerwaho abagabo batabigizemo uruhare.

Ati “Hano haracyari wa muco wo kurekera abana ababyeyi b’abagore ngo babe aribo babitaho gusa, kugira uruhare mu mirire ku bagabo biracyari hasi cyane, ariko binyuze muri ubu bukangurambaga ndahamya ko hazabaho impinduka, kandi ni ngombwa ko abagabo bagira uru ruhare”

Nyuma y’ubutumwa bwatanzwe n’abayobozi ndetse n’abafatanyabikorwa banyuranye, mu rwego rwo kumenya ko abagabo hari imyumvire yahindutse, bahawe umwanya wo gusubiza ku bibazo by’imirire, isuku n’isukura: babisubiza neza ndetse banahabwa ibihembo binyuranye mu rwego ku kabashimira.

 

Ajouter un commentaire

HTML restreint

  • Aucune balise HTML autorisée.